ကျောင်းသားသမဂ္ဂခေါင်းဆောင်လူငယ်တွေအပါအဝင် အင်းစိန်ထောင်က နိုင်ငံရေးအကျဉ်းသူ ၊အကျဉ်းသား ၁၃၀ ကို နယ်ထောင်တွေဆီ ဒီနေ့ ဧပြီလ ၂၄ ရက် မှာ ပြောင်းရွှေ့လိုက်တယ်လို့ နိုင်ငံရေးအကျဉ်းသားများအရေးလိုက်ပါဆောင်ရွက်ပေးကြတဲ့ရှေ့နေတွေဆီကသိရပါတယ်။
နယ်ထောင်တွေဆီကို ပြောင်းရွှေ့ခံရတဲ့ နိုင်ငံရေးအကျဉ်းသူ၊အကျဉ်းသား ဦးရေ ၁၃၀ မှာ အမျိုးသမီး ၃၀ ဦးပါ ဝင်ပါတယ်။
အင်းစိန်ထောင်ကနေ ကျိုက်မရောထောင်ကို အမျိုးသား ၂၀ ဦး ၊အမျိုးသမီး ၁၀ ဦး နဲ့ ဒိုက်ဦးထောင်ကို အမျိုးသား ၁၀၀ ဦး ၊အမျိုးသမီး ၃၀ ဦးပြောင်းရွှေ့လိုက်တာပါ။
ဒီလိုထောင်ပြောင်းခံရတဲ့အထဲမှာ ရန်ကုန်တက္ကသိုလ်ကျောင်းသားများသမဂ္ဂ ဗဟိုအလုပ်အမှုဆောင် ကိုအောင်ဖုန်းမော် ၊ကိုလေပြေစိုးမိုး ၊ ရန်ကုန်ပညာရေးတက္ကသိုလ် ကျောင်းသားများသမဂ္ဂ ဒုဥက္ကဋ္ဌ ကိုဆစ်နိုင် တို့ပါဝင်တယ်လို့ ရန်ကုန်တက္ကသိုလ် ကျောင်းသားများသမဂ္ဂကလည်းထုတ်ပြန်အသိပေးပါတယ်။
ဒီလို နိုင်ငံရေးအကျဉ်းသားတွေကို ထောင်ပြောင်းရွှေ့တာဟာ စိတ်ဓာတ်ပျက်ပြားစေဖို့အတွက်နှိပ်စက်တာဖြစ်ပြီး ထောင်တွင်းနိုင်ငံရေးအရ စည်းရုံးတာကို ဟန့်တားတာဖြစ်နိုင်တယ်လို့ ဝေဖန်မှုတွေရှိနေကြောင်း ရန်ကုန်တက္ကသိုလ် ကျောင်းသားများသမဂ္ဂကဆိုထားပါတယ်။