မကွေးတိုင်း၊ ရေစကြိုမြို့နယ်တွင် ရှင်မတောင်ပေါ်သို့ အင်အားဖြည့်ရန်လာသည့် အကြမ်းဖက်စစ်ကောင်စီတပ်ကားတစ်စီး မိုင်းဆွဲတိုက်ခိုက်ခံရပြီး အကြမ်းဖက်စစ်သား
တစ်ဦးသေဆုံးကြောင်းပြည်သူကာကွယ်ရေးတပ်ဖွဲ့-ရေစကြိုက သတင်းထုတ်ပြန်သည်။
ယမန်နေ့ (ဧပြီလ ၂၇ ရက်) နံနက် ( ၁၁) နာရီဝန်းကျင်ခန့်က ရှင်မတောင်ပေါ်သို့ အင်အားဖြည့်ရန်လာသော အကြမ်းဖက်စစ်တပ်ကား ( ၁) စီးအား မိုင်းဆွဲ တိုက်ခိုက်ခဲ့ရာ ကားမှာ ပျက်စီးသွားပြီး စစ်သားတစ်ဦးသေဆုံး၍ အများအပြားဒဏ်ရာရရှိသွားကြောင်း၊ အကြမ်းဖက်စစ်တပ်ဘက်မှ ရမ်းသမ်းပစ်ခတ်သော်လည်း ပြည်သူကာကွယ်ရေးရဲဘော်များ အထိအခိုက်မရှိကြောင်း ပြည်သူကာကွယ်ရေးတပ်ဖွဲ့-ရေစကြိုက အသိပေးသည်။
သတင်းထုတ်ပြန်ချက်နှင့်ပတ်သက်၍ ပြည်သူကာကွယ်ရေးတပ်ဖွဲ့-ရေစကြိုထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။
ရေစကြို PDFသည် ယခင်ရက်ပိုင်းက ပခုက္ကူ-ချောင်းဦးလမ်းမကြီးအပါအဝင် ရေစကြိုမြို့နယ်တွင်းလမ်းများအား နယ်မြေလုံခြုံရေးအတွက် ခရီးသွားကားများအား စစ်ဆေးခဲ့သေးသည်။
ဧပြီ ( ၁၉) ရက်နေ့ကလည်း ရေစကြိုမြို့နယ်၊ဇီးကုန်းနှင့်ဇီးကုန်းကျွန်းကြားတွင် အကြမ်းဖက်စစ်တပ်နှင့် ပျူစောထီးများအား မိုင်း( ၂) လုံးဆွဲတိုက်ခိုက်ခဲ့ရာ ဆိုင်ကယ် နှင့်ကားများ ပျက်စီးသွားပြီး နေရာတွင် ( ၄) ဦးသေဆုံးကာ အများအပြား ထိခိုက်ဒဏ်ရာ ရရှိသွားကြောင်းလည်း ခုတ်ပြန်ထားသည်၊ထိုအပြင် ဧပြီ ၁၉ ရက် ညနေပိုင်းတွင်လည်း အလယ်သောင်နှင့် ဂွက်ကြီးရွာကြားတွင် အကြမ်းဖက်စစ်အုပ်စုကားများအား မိုင်း ( ၁ ) လုံး ဆွဲတိုက်ခိုက်ခဲ့ရာ ပျက်စီးထိခိုက်မှုများရှိကြောင်း PDF -ရေစကြိုမြို့နယ်က သတင်းထုတ်ပြန်ထားသည်။