ထွက်ပြေးစဥ် အမျိုးသားတစ်ဦးမှာ ကြွက်တက်သေဆုံး
စစ်ကိုင်းတိုင်း၊ ရွှေဘိုခရိုင် ခင်ဦးမြို့နယ်တွင် အကြမ်းဖက်စစ်ကောင်စီတပ်ယာဥ်များ မိုင်းဆွဲခံရပြီးနောက် ကျေးရွာများအား ရမ်းကားပစ်ခတ်နေသောကြောင့် ကျေးရွာ ငါးရွာရှိ ပြည်သူများထွက်ပြေးတိမ်းရှောင်နေရကြောင်း ဒေသခံများက ပြောသည်။
ထိုသို့ ထွက်ပြေးစဥ် အမျိုးသားတစ်ဦးမှာ ကြွက်တက်သေဆုံးသွားကြောင်း ၎င်းတို့က ပြောသည်။
ယနေ့ (ဧပြီလ ၂၈ ရက်နေ့ မွန်းလွဲ ၂ နာရီခန့်က ရွှေဘိုမြို့ဘက်မှလာသော သံချပ်ကာကားပုံစံပြုလုပ်ထားသော အကြမ်းဖက်စစ်ကောင်စီ၏ ဖောကား(၁၀)စီးအား ARF အဖွဲ့မှ နေရာလေးနေရာမှ မိုင်းဆွဲတိုက်ခိုက်ရာ ကားနှစ်စီး ထိခိုက်ပျက်စီးခဲ့ကြောင်း Armed Revolutionary Force K.U အဖွဲ့က ပြောသည်။
Public Service Announcement
A R Fအဖွဲ့သည် နေရာများစွာ မိုင်းများခွဲထား၍ အကြမ်းဖက်စစ်ကောင်စီတပ်သား ၂၀ခန့်ကျသည်ဟုသိရကြောင်း၊ ခင်ဦး – ရေဦး လမ်းပိုင်း အခြေအနေ ရှုပ်ထွေးနေ၍ ပြည်သူများလမ်းပေါ်လုံးဝ မတက်ကြပါရန်လည်း သတိပေးထားသည်။
အကြမ်းဖက်စစ်တပ်က မိုင်းခွဲခံရသည့် ခင်ဦး-ရေဦး ကားလမ်းဘေးရှိ ကျေးရွာများအား ဝင်ရောက်ရမ်းကားမွှေနှောက်ဖျက်ဆီးမှုများ ပြုလုပ်နေ၍ ရွာငါးရွာခန့် ထွက်ပြေးတိမ်းရှောင်နေရကြောင်း ဒေသခံများက ပြောသည်။
အကြမ်းဖက်စစ်တပ်သည် ခင်ဦးမြို့နယ် မြင်းဒေါင်းကျေးရွာနှင့် အင်းပတ်ကွေ့အနီးတွင် ပြည်သူများအား စစ်ဆေးရိုက်နှက်နှိပ်စက်နေပြီး ဖမ်းဆီးခံရသူများလည်း ရှိနေကြောင်း ဒေသခံများက ပြောသည်။
အကြမ်းဖက်စစ်တပ်သည် ခင်ဦးမြို့နယ်အတွင်း ကျေးရွာများအား ဝင်ရောက်ဖျက်ဆီးမီးရှို့မှုများ ပြုလုပ်နေပြီး ဧပြီ ၂၆ ရက်က သံဘိုကျေးရွာအား ဝင်ရောက်ဖျက်ဆီးမီးရှို့ခဲ့ရာ ရွာလုံးကျွတ်နီးပါး မီးလောင်ပြာကျခဲ့သည်။
