စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်တပ်က အရပ်သားပြည်သူများအား ကားဖြင့် လိုက်လံပစ်ခတ်ရာ အသက်၅၀အရွယ် အမျိုးသမီးတစ်ဦး ဦးခေါင်းထိမှန်သေဆုံးပြီး လေးဦးဒဏ်ရာရရှိကြောင်း ဒေသခံများက ပြောသည်။
ယမန်နေ့ (ဧပြီ ၂၉ ရက်)က ဒီပဲယင်းနယ်၊ ရွာသစ်နှင့်မဲသည်ကျေးရွာ အနီးတဝိုက်ရှိ ပြည်သူများအား အကြမ်းဖက်စစ်အုပ်စုက ကားဖြင့်လိုက်လံ ပစ်ခတ်သတ်ဖြတ်ခဲ့၍ အသက် ၅၀အရွယ် စစ်ဘေးရှောင်အမျိုးသမီးတစ်ဦး ဦးခေါင်း ကျည်ထိမှန်သေဆုံးခဲ့ရပြီး အခြားလေးဦး ကျည်ထိမှန် ဒဏ်ရာရထားကြောင်း ဒေသခံများက ပြောသည်။
အကြမ်းဖက်စစ်တပ်သည် ဒီပဲယင်းမြို့နယ် အရှေ့တောင်ခြမ်းရှိ ကျေးရွာများကို ယမန်နေ့ နံနက်ပိုင်းက ဒီပဲယင်းမြို့ပေါ်မှ အင်အား ၃ဝကျော်ဖြင့် ကားနှင့်ထွက်လာပြီး လမ်းဘေးရှိပြည်သူများကို သေနတ်ဖြင့် လိုက်လံပစ်ခတ်ခဲ့ခြင်းဖြစ်ကြောင်း၊ ၎င်းတို့၏ပစ်ခတ်မှုကြောင့် မဲသည်ကျေးရွာသူ အသက်၅၀အရွယ် ဒေါ်နှင်းမှာ ဦးခေါင်းနှင့် နံဘေး ကျည်နှစ်ချက် ထိမှန်သေဆုံးခဲ့ရကာ (အသက် ၄၀)အရွယ် မမာဝေဆိုသူမှာ ကျောကုန်းထိမှန်ပြီး စိုးရိမ်ကြောင်း၊ အသက် ၂၀အရွယ် မမိထော်သည် လည်ပင်းအနီး ထိမှန်ခဲ့ပြီး မစိုးရိမ်ရကြောင်း၊ အသက်(၃၀)ဝန်းကျင် အမျိုးသားတစ်ဦး ပေါင်ထိမှန်ပြီး ကျည်ခွဲထုတ်ခဲ့ရကြောင်း ဒေသခံများက ပြောသည်။
အကြမ်းဖက်စစ်တပ်သည် ယင်းတွေကျေးရွာ၊ လက်တီးကျေးရွာများကိုလည်း ဝင်ရောက်ဖျက်ဆီးမီးရှိူ့သွားကြောင်း၊ ရွာသူရွာသားများလည်း ထွက်ပြေးတိမ်းရှောင်နေရပြီး အကူအညီများလိုအပ်နေကြောင်း ဒေသခံများက ပြောသည်။
Public Service Announcement
သင်္ကြန်အပြီးကာလတွင် အကြမ်းဖက်စစ်တပ်က ရေဦးနှင့် ဒီပဲယင်းနယ်စပ်ကျေးရွာများအား ငါးရက်ဆက်တိုက် စစ်ကြောင်းထိုးခဲ့ပြီး ကျေးရွာများအား မီးရှို့ဖျက်ဆီးမှုများ ပြုလုပ်ခဲ့သည်။
