မကွေးတိုင်း၊ ပခုက္ကူခရိုင်၊ မြစ်ခြေမြို့နယ်တွင် ယနေ့နံနက်ပိုင်းက စစ်ကောင်စီတပ်အား နှစ်ကြိမ်တိုင်ခုခံတိုက်ခိုက်ခဲ့ရာ စစ်သား ၁၀ ဦးသေဆုံးကြောင်း မြစ်ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့(MC-KC PDF) အဖွဲ့က သတင်းထုတ်ပြန်သည်။
မေလ ၁ ရက်နေ့ နံနက် ၈ နာရီခန့်က မြစ်ခြေ-စဘေ-ဆားကျင်း မြေနီကားလမ်းမကြီးပေါ်တွင် အကြမ်းဖက်စစ်ကောင်စီတပ်သားများလိုက်ပါလာသော စစ်ကား ၃ စီးနှင့်အတူ မိုင်းများရှာဖွေနေသော စစ်သားများအား ဆားကျင်းရွာအနီးတွင် တပ်ခွဲ ၃ ရဲဘော်များမှ မိုင်းဆွဲတိုက်ခိုက်ခဲ့ပြီးနောက် အပြန်အလှန်ပစ်ခတ် တိုက်ပွဲဖြစ်ပွားခဲ့သည်။
ထိုအပြင်နံနက် ၁၀ နာရီခန့်ကလည်း တန့်ကြည့်တောင်ဘုရားကြီးဘက်မှ ပခုက္ကူ-ဆိပ်ဖြူ ကားလမ်းမကြီးပေါ်သို့ ကူးသန်းသွားလာရသည့် လမ်းပိုင်းတစ်ခုဖြစ်သော မုံတောင်လမ်းပိုင်းပေါ်တွင်စစ်ကားနှစ်စီးအား မုံတောင်အန္တရာယ်ကွေ့၌ တပ်ခွဲ ၁ ရဲဘော်များက ထပ်မံမိုင်းဆွဲတိုက်ခိုက်ခဲ့ကြောင်း ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့(MC-KC PDF) အဖွဲ့ကပြောသည်။
အဆိုပါတိုက်ခိုက်မှုများတွင် စစ်ကောင်စီတပ်ကားတစ်စီး ထိခိုက်ပျက်စီးခဲ့ပြီး အကြမ်းဖက်စစ်သား ၁ဝ ဦး နေရာတွင်ပင် သေဆုံးခဲ့ကာ ထိခိုက်ဒဏ်ရာရသူ အများအပြား ရှိကြောင်းလည်းဖော်ပြထားသည်။စစ်ကောင်စီတပ်ဘက်မှ ပြန်လည်ပစ်ခတ်သော လက်နက်ကြီးအပိုင်းအစထိမှန်ကာ ရဲဘော်တစ်ဦး ညာလက်ဖျံနှင့် ညာဘက်ပေါင်တွင် ထိခိုက်ဒဏ်ရာရရှိခဲ့ပြီး ရဲဘော်များ တပ်ခွဲအသီးသီးသို့ ပြန်လည်ဆုတ်ခွာနိုင်ခဲ့ကြောင်း မြစ်ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့(MC-KC PDF) အဖွဲ့က သတင်းထုတ်ပြန်သည်။
Public Service Announcement
“ဖြစ်စဥ်က ၂ နေရာဖြစ်တာပါ။ ဒီမနက်ဖြစ်တာ။”ဟု မြစ်ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့(MC-KC PDF) တာဝန်ရှိသူက ပြောသည်။
မြစ်ခြေ-ကျွန်းချောင်း ပြည်သူ့ကာကွယ်ရေးတပ်ဖွဲ့(MC-KC PDF) အဖွဲ့သည် ပခုက္ကူခရိုင်၊ မြစ်ခြေနယ်တစ်ဝိုက်တွင် အခြေစိုက်ထားပြီး ပခုက္ကူ-မြစ်ခြေ-ကျွန်းချောင်း ဆိပ်ဖြူ လမ်းမကြီးတစ်ဝိုက်၌ အကြမ်းဖက်စစ်ကောင်စီအား ခုခံတိုက်ခိုက်လျက်ရှိသည်။
