ဒေါ်လာနဲ့ရွှေချောင်းတွေ တံစိုးလက်ဆောင်အဖြစ်ယူတယ်ဆိုကာ အဂတိပုဒ်မ နဲ့စွဲချက်တင်တဲ့အပေါ် ဆုံးဖြတ်ပေးဖို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ဘက်က လျှောက်ထားမှုကို ဒီနေ့မှာ ပလပ်လိုက်တယ်လို့သိရပါတယ်။
ဦးဖြိုးမင်းသိန်း ထံက နေရွှေချောင်းနဲ့ဒေါ်လာတွေ လက်ခံတယ်ဆိုကာစစ်ကောင်စီက ဒေါ်အောင်ဆန်းစုကြည်ကို အဂတိပုဒ်မနဲ့တရားစွဲပြီး နေပြည်တော် အထူးတရားရုံးကလည်း တရားစွဲတဲ့ပုဒ်မနဲ့ပဲ စွဲချက်တင်ခဲ့ပါတယ်။
ဒီလို တရားရုံးရဲ့ စွဲချက်တင်တဲ့အပေါ် စွဲချက်တင်သင့် ၊မတင်သင့် ဆုံးဖြတ်ပေးဖို့ ဒေါ်အောင်ဆန်းစုကြည် တို့ဘက်က ပြည်ထောင်စုတရားလွှတ်တော်ချုပ်ကို လျှောက်ထားခဲ့ပါတယ်။
ဒါပေမယ့် အဲဒီလျှောက်ထားမှု အပေါ် ဆုံးဖြတ်ချက်မထွက်မီမှာ နေပြည်တော်အထူးတရားရုံးက ဒေါ်အောင်ဆန်းစုကြည်ကို စွဲချက်တင်ထားတဲ့ အဂတိပုဒ်မနဲ့ ပြီးခဲ့တဲ့ ရက်ပိုင်းက ထောင်ဒဏ် ၅ နှစ်ချလိုက်ပါတယ်။
ထောင်ချပြီးရက်ပိုင်းအကြာမှာတော့ ပြည်ထောင်စု တရားလွှတ်တော်ချုပ်ကလည်း ဒေါ်အောင်ဆန်းစုကြည်တို့ဘက်က လျှောက်ထားချက်ကို ပလပ်လိုက်ပါတော့တယ်။
အကယ်၍ ပြည်ထောင်စုတရားလွှတ်တော်ချုပ်က ဒေါ်အောင်ဆန်းစုကြည် အပေါ် အဂတိပုဒ်မနဲ့စွဲချက်မတင်သင့်ဘူးလို့ ဆုံးဖြတ်ခဲ့ရင်တော့ ထောင် ၅ နှစ်ချထားတဲ့ အမိန့်ဟာပယ်ပျက်မှာဖြစ်ပါတယ်။
ဒါပေမယ့် လျှောက်ထားချက်ကို အခုလို ပလပ်လိုက်တဲ့အတွက် နေပြည်တော်အထူးတရားရုံးက ချထားတဲ့ အမိန့်ဟာ အတည်ဖြစ်သွားပါတယ်။