မတူပီမြို့မှပြန်လာသည့် စစ်ကောင်စီတပ်ယာဉ်တန်းကို ယနေ့နံနက်တွင် ထပ်မံတိုက်ခိုက်ခဲ့ကြောင်း မင်းတပ် ချင်းကာကွယ်ရေးတပ်(CDF) ပြောရေးဆိုခွင့်ရှိသူ ဆလိုင်းဟာအွမ်က ပြောကြားသည်။
မေလ ၇ရက် နံနက်တွင် စစ်ကောင်စီတပ်ယာဉ်တန်း ထွက်ခွာလာချိန်တွင် နံနက် ၃နာရီခွဲမှ မိုင်းခွဲတိုက်ခိုက်မှုများပြုလုပ်ခဲ့သည်ဟု မင်းတပ် CDFက ထုတ်ပြန်ခဲ့ပြီး စစ်ကောင်စီတပ်မှ သေဆုံးထိခိုက်များနိုင်သည်ဟု ခန့်မှန်း ဖော်ပြထားသည်။
“မိုင်းက တောက်လျှောက်ကွဲတာ။ ထိခိုက်မှုများနိုင်တယ်။သူတို့ရဲ့ အသံတွေလည်းကြားနေရတယ်။ အဲဒါဆိုတော့ ဖြစ်နိုင်ခြေကတော့ အများအပြား အသေအဆုံးရှိနိုင်တယ်”ဟု ဆလိုင်းဟာအွမ်က ပြောသည်။
ယနေ့ ရာသီဥတုအခြေအနေမှာဆက်လက်ဆိုးရွားနေဆဲဖြစ်ကြောင်း၊ CDF ရဲဘော်များအတက်နိုင်ဆုံး စစ်ကောင်စီတပ်ကို ခုခံတိုက်ခိုက်နေဆဲဖြစ်ကြောင်း ၎င်းကဆိုသည်။
Public Service Announcement
စစ်ကောင်စီတပ်သည် မတူပီ – မင်းတပ်လမ်း မိုင်(၄၀)ရှိ ကျေးရွာမှပြည်သူလူထု နေအိမ်များကိုလည်း မီးရှို့ဖျက်ဆီးခဲ့သည်ဟု မင်းတပ် CDFက ထုတ်ပြန်သည်။
အဆိုပါ စစ်ကောင်စီတပ်သည် မတူပီမှ မင်းတပ်၊ မင်းတပ်မြို့မှ ကျောက်ထု ၊ ကျောက်ထုမှ ပခုက္ကူမြို့သို့ သွားရောက်မည်ဟု သိရ၍ မင်းတပ်ကျော်သွားပါက ယောဒေသကာကွယ်ရေးတပ်(YDF)၊ ပြည်သူ့ကာကွယ် ရေးတပ်(PDF)များအနေဖြင့် စစ်ယာဉ်တန်းကို အသာ တကြည်ဖြတ်သန်းခွင့်မပြုရန် မင်းတပ် CDF ပြောရေး ဆိုခွင့်ရှိသူက ပြောသည်။
“အားလုံးက အလိုမရှိဘူးဆိုတာပြသဖို့ အတက်နိုင် တိုက်ခိုက်ဖို့တွန်းလှန်ဖို့ ပြောချင်တာပေါ့”ဟု ဆလိုင်းဟာအွမ်က ပြောသည်။
