မကွေးတိုင်း၊ မြိုင်မြို့နယ်တွင် အကြမ်းဖက်စစ်ကောင်စီတပ်က ဒေသခံပြည်သူနှစ်ဦးကိုလည်းသတ်ဖြတ်သွားပြီး ကျေးရွာသုံးရွာအား မီးရှို့ဖျက်ဆီးမှုကြောင့် နေအိမ် ၉၀ကျော် ပျက်စီးဆုံးရှုံးခဲ့ရကာ ကူညီထောက်ပံ့မှုများ အရေးပေါ်လိုအပ်နေကြောင်း ဒေသခံများက ပြောသည်။
မြိုင်မြို့နယ်တွင် မေလ ၁ရက်မှ ၄ရက်အထိ အကြမ်း ဖက်စစ်အုပ်စုက အပြစ်မဲ့ပြည်သူနှစ်ဦးကို သတ်ဖြတ်ခဲ့ကာ ကျေးရွာသုံးရွာမှာ နေအိမ်များနှင့်ပစ္စည်းများကို မီးရှို့ဖျက်ဆီးခဲ့သောကြောင့် အရေးပေါ်ထောက်ပံ့ကူညီမှုများလိုအပ်နေကြောင်း ဒေသခံများက ပြောသည်။
မြိုင်မြို့နယ်ရှိ ရွာသစ်ကြီးကျေးရွာမှ နေအိမ်စုစုပေါင်း ၇၅လုံး ၊ ကားသုံးစီး ၊ ဆိုင်ကယ်အစီးရေ ၅၀ကျော် ၊ နှမ်းစားကျင်းကျေးရွာမှ နေအိမ်စုစုပေါင်း ခုနစ်လုံး ၊ ဆိုင်ကယ်အစီးရေ ၃၀ကျော်နှင့် လှည်းနှစ်စီး၊ သံဘိုကြီးကျေးရွာမှ နေအိမ်စုစုပေါင်း ၁၀လုံးကို အကြမ်းဖက်စစ်အုပ်စုက မီးရှို့ဖျက်ဆီးခဲ့ကြောင်း ဒေသခံများက ပြော သည်။
ထို့အပြင် အကြမ်းဖက်အုပ်စုသည် ရွာသစ်ကြီးကျေးရွာ ဘုန်းတော်ကြီးကျောင်းအတွင်းမှ ကွန်ပျူတာ ၁၃လုံးနှင့် အခြားဆက်စပ်ပစ္စည်းများကိုလည်း ဖျက်ဆီးခဲ့ကြကြောင်း ဒေသခံများက ပြောသည်။
Public Service Announcement
“ရွာထဲမှာ မီးမလောင်ဘဲကျန်ခဲ့တဲ့ နေအိမ်တွေက ပစ္စည်းတွေကိုလည်း ဖျက်ဆီးသွားတယ်။ ငွေနဲ့တန်ဖိုးကြီးပစ္စည်းတွေတော့ စစ်တပ်က ယူသွားတယ်။”ဟု နယ်ခံတစ်ဦးက ပြောသည်။
အခြားသော အတည်မပြုနိုင်သေးသည့် ပျက်စီးဆုံးရှုံးမှုများလည်း များစွာကျန်ရှိနိုင်ကြောင်း ဒေသခံများက ပြောသည်။
အကြမ်းဖက်စစ်ကောင်စီသည် အာဏာသိမ်းပြီးနောက် ပိုင်း ၂၀၂၁ဖေဖော်ဝါရီ ၁ ရက်မှ ၂၀၂၂ ဧပြီ ၃၀ ရက်အထိ ၁၅ လတာအတွင်း ပြည်သူများ၏နေအိမ် ၁၁,၄၁၇လုံးအထိ မီးရှို့ဖျက်ဆီးထားသည်ဟု Data For Myanmar က ထုတ်ပြန်ထားသည်။
အကြမ်းဖက်စစ်ကောင်စီသည် စစ်ကိုင်းတိုင်းအတွင်း အိမ်ခြေပေါင်း ၇,၅၀၀ကျော် မီးရှို့ဖျက်ဆီးထားပြီး မကွေးတိုင်းက ၂,၁၀၀ကျော်ဖြင့် ဒုတိယအများဆုံး မီးရှို့ခံထားရသည်။
