စစ်ကိုင်းတိုင်း၊ မုံရွာ-မန္တလေးလမ်းမကြီးပေါ်တွင် အကြမ်းဖက်စစ်ကောင်စီတပ်ယာဥ်တန်းအားပဒေသာမိုင်းဆွဲတိုက်ခိုက်ခဲ့ပြီးထိခိုက်မှုများရှိကြောင်းအာဏာရှင်စနစ်တိုက်ဖျက်ရေးပြည်သူ့တပ်ဖွဲ့(PAFD) ကသတင်းထုတ်ပြန်သည်။
ယနေ့ (မေလ ၁၄ ရက်နေ့) နံနက် ၁၁း၃၀ ခန့်က မန္တလေးမှ မြင်းမူသို့ထွက်ခွာလာသော အကြမ်းဖက်စစ်ကောင်စီတပ်များလိုက်ပါလာသည့်ပေါင်မုန့်ကားအစီး ၂၀နှင့် Express ကားတစ်စီးအားမြင်းမူမြို့ နှင့် ဝမ်းပြည့်ရွာကြားတွင် ပဒေသာမိုင်းဆွဲကာတိုက်ခိုက်ခဲ့ကြောင်း PAFD ကအသိပေးသည်။
“ကားတစ်စီးပွင့်ထွက်သွားပြီး အတော်များများသေပြီး ဒဏ်ရာရသူလဲများတယ်လို့ ဒေသခံများမှသတင်းပို့လာပါတယ်။ အထဲဝင်မရလို့ အတိအကျတော့မသိရပါဘူးတဲ့ခင်ဗျ”ဟု PAFD တာဝန်ရှိသူက ပြောသည်။
အာဏာရှင်စနစ်တိုက်ဖျက်ရေး ပြည်သူ့တပ်ဖွဲ့(PAFD) တပ်ခွဲ DK PDF MMUမှတိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိဆုတ်ခွာခဲ့ကြောင်းPAFD ကအသိပေးသည်။
Public Service Announcement
ယမန်နေ့ (မေလ ၁၃ ရက်) နေ့လယ်ပိုင်းကလည်း မုံရွာ – မန္တလေးလမ်းမကြီး၊ မြေနဲရွာအနီး၌ အကြမ်းဖက်စစ်တပ်နှင့် ရဲများလိုက်ပါလာသည့်FAW ကားတစ်စီးအားမိုင်းသုံးလုံး တစ်ပြိုင်တည်း ဖောက်ခွဲတိုက်ခိုက်ခဲ့ပြီး အကြမ်းဖက်စစ်တပ်မှ ၁၅ ဦးခန့်ထိခိုက်ဒဏ်ရာရရှိခဲ့သည်။
