စစ်ကောင်စီ၏ လူ့အခွင့်အရေးချိုးဖောက်မှုများတာဝန်ခံမှုရှိစေရေး အမေရိကန်ဆက်လက်ဖိအားပေးလုပ်ဆောင်မည်ဟု ထိပ်တန်းတာဝန်ရှိသူပြော
အာဏာသိမ်းစစ်ကောင်စီ၏ လူ့အခွင့်အရေးချိုးဖောက်မှုများအပေါ် တာဝန်ယူမှု၊ တာဝန်ခံမှုရှိစေရေး အမေရိကန်က ဆက်လက်ဖိအားပေးလုပ်ဆောင်မည်ဟု သမ္မတဂျိုးဘိုင်ဒင်၏ ဒီမိုကရေစီနှင့် လူ့အခွင့်အရေးဆိုင်ရာ ဒါရိုက်တာ Rob Berschinskiက ပြောသည်။
အထက်ပါ ဒီမိုကရေစီနှင့် လူ့အခွင့်အရေးဆိုင်ရာဒါရိုက်တာသည် NUG နိုင်ငံခြားရေး ဝန်ကြီး ဒေါ်ဇင်မာအောင်ကို မေလ၁၃ ရက်တွင် အိမ်ဖြူတော်၌ လက်ခံတွေ့ဆုံစဉ် အမေရိကန်သမ္မတ ဂျိုးဘိုင်ဒင်နှင့် အမေရိကန်ပြည်ထောင်စုသည် မြန်မာပြည်သူများ၏ ရုန်းကန်လှုပ်ရှားမှုနှင့်အတူ ရပ်တည်နေကြောင်း ထည့်သွင်းပြောကြားသည်။
နှစ်ရက်တာ ကျင်းပခဲ့သော အမေရိကန်-အာဆီယံထိပ်သီးညီလာခံ၌ မြန်မာအတွက် ထိုင်ခုံ အလွတ်ထားသော်လည်း အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး၊ ဒုတိယ ဝန်ကြီးတို့ဦးဆောင်သော ကိုယ်စားလှယ်အဖွဲ့သည် အမေရိကန်နိုင်ငံခြားရေး ဒုတိယဝန်ကြီး အပါအဝင် အစိုးရထိပ်တန်းတာဝန်ရှိသူများနှင့် တွေ့ဆုံခဲ့သည်။
Public Service Announcement
ထို့အပြင် ဝါရှင်တန်သို့ ရောက်ရှိနေသော မလေးရှားနိုင်ငံခြားရေးဝန်ကြီးအပါအဝင် အာဆီယံနိုင်ငံအချို့မှ ဝန်ကြီးအချို့ကိုလည်း NUG နိုင်ငံခြားရေးဝန်ကြီးဦးဆောင်သော ကိုယ်စားလှယ်အဖွဲ့က လူချင်းတွေ့ဆုံဆွေးနွေးနိုင်ခဲ့သည်။
အကြမ်းဖက်စစ်ကောင်စီကမူ အမေရိကန်-အာဆီယံထိပ်သီးညီလာခံအပြီး ပူးတွဲထုတ်ပြန် ကြေညာချက်ပါ မြန်မာ့အရေးဖော်ပြချက်ကို ပယ်ချကြောင်းနှင့် NUG ကိုယ်စားလှယ်အဖွဲ့ကို လက်ခံ တွေ့ဆုံသည့် အမေရိကန်အစိုးရ တာဝန်ရှိသူများကိုလည်း ကန့်ကွက်ကြောင်း ယနေ့သတင်း ထုတ်ပြန်သည်။
ထို့အပြင် အကြမ်းဖက်စစ်ကောင်စီသည် အာဆီယံအဖွဲ့ဝင်နိုင်ငံများ၊ မိတ်ဖက်အစိုးရတာဝန်ရှိ သူများနှင့် လွှတ်တော်ကိုယ်စားလှယ်များကို CRPH ၊ NUGကိုယ်စားလှယ်များနှင့် ထိတွေ့ဆက် ဆံခြင်းမပြုရန် တောင်းဆိုထားသည်။
အာဆီယံအဖွဲ့ဝင် မလေးရှားက မြန်မာ့အကျပ်အတည်းဖြေရှင်းရေး ပြည်သူရွေးချယ်တင်မြှောက်ထားသော NUG အစိုးရ၊ အမျိုးသားညီညွတ်ရေးအတိုင်ပင်ခံကောင်စီ NUCC အပါအဝင် ပါဝင်သင့်သူများနှင့် အလွတ်သဘောထိတွေ့ဆက်ဆံရန် အာဆီယံကို အဆိုပြုထားသည်။
