ရခိုင်ပြည်သူလူထု ထိခိုက်နာကျင်ခံစားရမှုများ တရားမျှတမှုရှိစွာ ပြန်လည်ကုစားနိုင်ရေး ကြိုးပမ်းမည်ဟု NUG ကတိပြု

▪️ရခိုင်လူထုရပိုင်ခွင့်အတွက် သက်ဆိုင်သူအဖွဲ့အစည်းအားလုံးနှင့်အတူတကွ ပူးပေါင်းမည်ဟုဆို

ရခိုင်ပြည်ရှိ ပြည်သူလူထု၏ထိခိုက်နာကျင်ခံစားခဲ့ရမှုများအတွက် တရားမျှတမှုရှိစွာ ပြန်လည် ကုစားဖြည့် ဆည်းပေးနိုင်ရန် အမျိုးသားညီညွတ်ရေးအစိုးရ NUG က ကြိုးပမ်းဆောင်ရွက်မည်ဖြစ်ကြောင်း ယနေ့ ထုတ်ပြန်သည်။

ယနေ့ကျရောက်သော (၉)ကြိမ်မြောက် “ရက္ခိုင်အမျိုးသားနိ” (ရခိုင်အမျိုးသားနေ့)တွင် NUG က သဝဏ်လွှာပေးပို့ရာတွင် လွန်ခဲ့သောနှစ်များအတွင်း ရခိုင်ပြည်အပါအဝင် နယ်နိမိတ်ချင်းထိစပ်သည့်နယ်မြေဒေသများအတွင်း စစ်ရေး၊ နိုင်ငံရေးပဋိပက္ခများကြောင့် ပြည်သူလူထုနည်းမျိုးစုံဖြင့်ထိခိုက်နာကျင်ခဲ့ရမှုများအတွက် များစွာ ကိုယ်ချင်းစာနာပြီး၊ ပျက်ကွက်မှုများစွာဖြစ်ပေါ်ခဲ့ခြင်းအတွက်လည်း အလွန်ပင်စိတ်မကောင်းဖြစ်ရပါကြောင်း ဖော်ပြသည်။

ရခိုင်ပြည်နယ်အတွင်းရှိ ပြည်သူများ၏ ရပိုင်ခွင့်များရရှိစေရန် သက်ဆိုင်သူအဖွဲ့အစည်းအားလုံးနှင့်အတူတကွ ပူးပေါင်း၍ ကြိုးပမ်းဆောင်ရွက်သွားမည်ဖြစ်ကြောင်းလည်း NUG ၏ သဝဏ်လွှာ၌ ဖော်ပြသည်။

Public Service Announcement

လက်ရှိတွင် ရခိုင်လူမျိုးများသည် မိမိတို့၏ ကိုယ်ပိုင်ပြဌာန်းခွင့်၊ နိုင်ငံရေးအရတန်းတူညီမျှမှုရရှိရေးနှင့် ရခိုင်ပြည်အတွင်း အမျိုးသားရေးစည်းလုံးညီညွတ်မှုများကို ကြိုးပမ်းတည်ဆောက်လျက် ရှိသည်ဟု NUG က ဆိုသည်။

ထို့အတူ ဖက်ဒရယ်ဒီမိုကရေစီစနစ်ကိုလိုလားကြသူတိုင်းရင်းသားလူမျိုးများအားလုံးသည် စစ်မှန်သောဖက်ဒရယ်ဒီမိုကရေစီ စနစ်ဖြင့် ပြည်ထောင်စုမြန်မာနိုင်ငံကို အသစ်တဖန်ပြန်လည်တည်ဆောက်ရန်ကြိုးပမ်း ဆောင်ရွက်လျက်ရှိနေချိန် လည်းဖြစ်ပြီး ရခိုင်အမျိုး သမီး၊ အမျိုးသားများ၏ ပြည့်ဝသောပါဝင်မှုနှင့် အခန်းကဏ္ဍသည် အလွန်အရေးကြီးကြောင်း ဖော်ပြလိုကြောင်း NUG က ထုတ်ပြန်သည်။

“ရက္ခိုင်အမျိုးသားနိ” (ရခိုင်အမျိုးသားနေ့) အချိန်အခါသာမယတွင် မြန်မာနိုင်ငံအပါအဝင် နိုင်ငံတကာ၌ရောက်ရှိနေထိုင်နေကြသော ရခိုင်အမျိုးသမီး၊ အမျိုးသားများအားလုံး ကိုယ်စိတ်နှစ်ဖြာ ကျန်းမာလုံခြုံ၍ဘေးရန်အပေါင်းမှကင်းကွာကြပါစေကြောင်း NUG က ဆုမွန်ကောင်းတောင်းသည်။