စစ်အာဏာရှင်အား ဖြုတ်ချရေး နောက်ဆုံးတိုက်ပွဲအတွက် အားမာန်အပြည့်ဖြစ်နေသည်ဟု အဆိုတော်မွန်းအောင်က ကေအိုင်အေ ဒုတိယဗိုလ်ချုပ်ကြီးဂွန်မော်နှင့်အတူတွဲ ရိုက်ထားသည့် ဓာတ်ပုံကို လှုမှုကွန်ရက်ပေါ်တင်ကာ သတင်းစကားပါးသည်။
ယခုရက်ပိုင်းအတွင်း ဒုဗိုလ်ချုပ်ကြီးဂွန်မော်နှင့်တွေ့ဆုံစဥ် ရိုက်ကူးထားသည့် ဓာတ်ပုံကိုအဆိုတော် မွန်းအောင်က သူ၏ ဖေ့စ်ဘွတ်လူမှုကွန်ရက်တွင် မေလ ၁၇ရက်ညကတင်ထားပြီး သတင်းစကားပါးခြင်းဖြစ်သည်။
” အမှန်တရားနဲ့သစ္စာတရားကို ယုံကြည်တန်ဖိုးထားတာခြင်း တူကြပေမယ့် ဘဝဖြတ်သန်းတဲ့ အတွေ့အကြုံတွေမတူကြပါဘူး။ ဒါပေမယ့် ယုံကြည်ချက်ခံယူချက် သံဓိဌာန်ခြင်း တူနေကြတုန်းပဲ။ အခုလည်း နောက်ဆုံးတိုက်ပွဲအတွက် အားမာန်အပြည့် ဖြစ်နေကြတုန်းပါ” ဟုအဆိုတော် မွန်းအောင်က ရေးသားထားသည်။
ဒုဗိုလ်ချုပ်ကြီးဂွန်မော်နှင့်အဆိုတော်မွန်းအောင်သည်ကျောင်းနေဖက်သူငယ်ချင်းများဖြစ်သည်။ ဒုဗိုလ်ချုပ်ကြီးဂွန်မော်က စစ်အာဏာရှင်ဖြုတ်ချနိုင်ရေး လက်နက်ကိုင်နိုင်ငံရေးလမ်းစဥ်ကို ရွေးချယ်ကာ ယခုအခါKIO/KIAတွင် ခေါင်းဆောင်တစ်ဦးဖြစ်သည်။ ဒုဗိုလ်ချုပ်ကြီးဂွန်မော်သည်ကချင်လွတ်လပ်ရေးအဖွဲ့ (KIO) ဗဟိုကော်မတီ ဝင်ဖြစ်သလို ၊ကချင်လွတ်လပ်ရေးကောင်စီ (KIC) ၏ဒုဥက္ကဌ လည်းဖြစ်သည်။
Public Service Announcement
အဆိုတော်မွန်းအောင်သည် နာမည်ကြီးအဆိုတော်အနေဖြင့် အောင်မြင်နေစဥ် ၈၈ အရေးအခင်းတွင် ပါဝင်ခဲ့၍ စစ်တပ်က လိုက်လံဖမ်းဆီးသောကြောင့် ပြည်ပသို့ ထွက်ခွာခဲ့ပြီး နိုင်ငံရေးကိစ္စများ ဆက်လက်လုပ်ကိုင်ခဲ့သူဖြစ်သည်။
နာမည်ကြီး တေးရေး၊အဆိုတော်ထူးအိမ်သင် ရေးသားပြီး မွန်းအောင်သီဆိုထားသည့် “ သွေးသစ္စာ” သီချင်းသည်စစ်အာဏာရှင် ဆန့်ကျင်ရေးနှင့် ဒီမိုကရေစီလှုပ်ရှားမှုများတွင် ပြည်သူလူထုအား စိတ်ခွန်အားပေးသည့် သီချင်းတစ်ပုဒ် ဖြစ်လာသည်။
“ သွေးသစ္စာ” သီချင်းကို ၁၉၈၉ ခုနှစ်တွင် မြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး မြေအောက်စခန်း၌ ထူးအိမ်သင် တောခိုခဲ့စဉ်က ရေးသားခဲ့ပြီး ၁၉၉၁ ခုနှစ်တွင် အဆိုတော် မွန်းအောင်က ဘန်ကောက်မြို့၌အသံသွင်းခဲ့သည်။ ၁၉၉၂ ခုနှစ်တွင် ဘန်ကောက်မြို့၌ပင် လျှို့ဝှက် ဖြန့်ချိခဲ့ပြီး ယနေ့အချိန်အထိ နိုင်ငံရေးသြဇာလွမ်းမိုးစေသည့် သီချင်းတစ်ပုဒ်ဖြစ်ပြီး နွေဦးတော်လှန်ရေးတွင် ခွန်အားပေးသောသီချင်းတစ်ပုဒ်ဖြစ်သည်။
သွေးသစ္စာသီချင်း https://youtu.be/Pv15P3Ozpg4
ကို ဒီမိုကရေစီအရေးလှုပ်ရှားမှုအခမ်းအနားများတွင် လွတ်လပ်စွာသုံးစွဲပိုင်ခွင့် ရှိသည်ဟုမွန်းအောင်က ခွင့်ပြုထားသည်။
” တစ်ယောက်က ဂီတနဲ့၊ တစ်ယောက်က သေနတ်နဲ့ ချနေကြတယ်။မအလ(မင်းအောင်လှိုင်) တို့ ရေစိုဝဲစားခွေးလိုထွက်ပြေးရတော့မယ်” ဟု အဆိုတော်မွန်းအောင်၏ ပရိတ်သတ်တစ်ဦးက လူမှုကွန်ရက်တွင် ရေးသားထားသည်။
