ရှမ်းပြည်နယ်တောင်ပိုင်း ဖယ်ခုံမြို့နယ် လွယ်ပေါရွာ၊ နန့်ပေါ်လုံရွာနှင့် နန်းဆွန့်ရွာတို့တွင် ယနေ့မနက် ပိုင်းမှစ၍ တစ်နေ့လုံး တိုက်ပွဲပြင်းထန်ခဲ့ကြောင်း ဖယ်ခုံ ပြည်သူ့ကာကွယ်ရေးတပ်(PDF)က သတင်းထုတ်ပြန်သည်။
မေလ ၂၀ ရက် နံနက် ၈နာရီမှစ၍ တိုက်ပွဲစတင်ခဲ့ရာ ဖယ်ခုံ PDF တပ်ရင်း(၂)မှ ရဲဘော် တစ်ဦးကျဆုံးပြီး အခြား တော်လှန်ရေးရဲဘော်တစ်ဦး ဒဏ်ရာရခဲ့ကြောင်း၊ စစ်ကောင်စီတပ်မှလည်း ကျဆုံးမှုများပြီး အရေအတွက် အတည်ပြုရန်ခက်ခဲကြောင်း ဖော်ပြထားသည်။
ယနေ့ တိုက်ပွဲတွင် စစ်ကောင်စီတပ်ကို ဖယ်ခုံ PDF၊ အလယ်ပိုင်းတိုင်းတိုက်ခိုက်ရေးအဖွဲ့၊မိုးဗြဲPDF ကျွဲဂျိုတပ်ခွဲ၊ (၁၀၀၅)တပ်ရင်းတို့ပူးပေါင်း တိုက်ခိုက်ခဲ့သည်ဟုဆိုသည်။
ပြည်သူ့ကာကွယ်ရေးပူးပေါင်းတပ်များ ပြန်လည်ဆုတ်ခွာသွားပြီးနောက် ညနေ ၆နာရီခွဲမှစ၍ စစ်ကောင်စီတပ်များက ကျေးရွာအတွင်း ဝင်ရောက်မီးရှို့နေကြောင်း ဖော်ပြထားသည်။
Public Service Announcement
ဖယ်ခုံနှင့် ညောင်ရွှေနယ်စပ်တွင် မေလ ၁၅ရက်မှစ၍ နေ့စဉ်တိုက်ပွဲဖြစ်ပွားနေပြီး နှစ်ဖက်လုံးထိခိုက်ကျဆုံးမှုရှိခဲ့သည်။ မေလ ၁၂ရက်က ညောင်ရွှေထီရိရွာ စစ်ကောင် စီတပ်စခန်းကို ကာကွယ်ရေးပူးပေါင်းတပ်က ဝင်ရောက်တိုက်ခိုက်သိမ်းပိုက်ပြီးနောက် စစ်ကောင်စီတပ်က ထိုးစစ်ဆင်လာ၍ တိုက်ပွဲပြင်းထန်နေခြင်းဖြစ်ပြီး လေကြောင်း တိုက်ခိုက်မှုများလည်း ပြုလုပ်ခဲ့သည်။
