အကြမ်းဖက်စစ်ကောင်စီ၏ သေဒဏ်အတည်ပြုခြင်းမှာ ပြည်တွင်း တည်ဆဲဥပဒေများနှင့် အပြည်ပြည်ဆိုင်ရာ ဥပဒေများအရ တရားမဝင်ကြောင်း NUG တရားရေးဝန်ကြီးဌာနက ယနေ့ ထုတ်ပြန်ကြေညာသည်။
၈၈ မျိုးဆက်ကျောင်းသားခေါင်းဆောင် ဦးဂျင်မီ၊ ကိုဖြိုးဇေယျာသော်နှင့် လူပုဂ္ဂိုလ် (၂)ဦးအပါအဝင် နိုင်ငံတဝန်းလုံးရှိ အပြစ်မဲ့ပြည်သူများအပေါ် အကြမ်းဖက် စစ်ကောင်စီ၏ သေဒဏ် အတည်ပြုခြင်းများကို ပြင်းထန်စွာ ကန့်ကွက်ရှုတ်ချကြောင်းနှင့် နောက်ဆက်တွဲ ဖြစ်ပေါ်လာမည့် အကျိုးဆက်များအားလုံးအတွက် အကြမ်းဖက် စစ်ကောင်စီက လုံးဝတာဝန်ခံရလိမ့်မည်ဖြစ်ကြောင်း ထုတ်ပြန်ချက်၌ ဖော်ပြသည်။
အကြမ်းဖက်စစ်ကောင်စီ၏ လက်အောက်ခံတရားရုံးများက ချမှတ်သည့် ပြစ်ဒဏ်များအားလုံးသည် မြန်မာနိုင်ငံ၏တည်ဆဲ ဥပဒေများနှင့် အပြည်ပြည်ဆိုင်ရာဥပဒေများကို ပြောင်ပြောင်တင်းတင်း ချိုးဖောက်ခြင်းဖြစ်ပြီး ယခုကဲ့သို့ ဥပဒေမဲ့အငြိုးအတေး အာဃာတများဖြင့် တရားစီရင်ရေးကို စိတ်ထင်ရာ တဖက်သတ် လုပ်ဆောင်ခြင်းနှင့် သေဒဏ်အားအတည်ပြုလုပ်ဆောင်ခြင်းသည် ကြီးလေးသောပြစ်မှုကြီးကို ကျူးလွန်ခြင်း ဖြစ်သည်ဟု ဆက်လက်ဖော်ပြသည်။
ထို့အပြင် စစ်ကောင်စီ လက်အောက်ခံအဖွဲ့အစည်းများနှင့် ပုဂ္ဂိုလ်များအနေဖြင့် ဥပဒေမဲ့ ဆောင်ရွက်ချက်များကို မသိကျိုးကျွန်ပြုခြင်း၊ အကြမ်းဖက် စစ်ကောင်စီ၏ အလိုကျ လိုက်ပါဆောင်ရွက်နေခြင်းများသည် ရာဇဝတ်မကင်းသော ပူးပေါင်းဆောင်ရွက်နေခြင်းဖြစ်သဖြင့် ပြည်သူလူထုနှင့် ဥပဒေ၏ ဒဏ်ခတ်အရေးယူခြင်းကို မလွဲမသွေ ခံကြရမည် ဖြစ်သည်ဟုလည်း ထုတ်ပြန် သည်။
Public Service Announcement
အကြမ်းဖက် စစ်ကောင်စီ အလိုကျအမှုများကို စစ်ဆေးစီရင်နေသည့် လက်အောက်ခံ တရားရုံးများ၊ တရားရေး ဝန်ထမ်းများ၊ ဥပဒေဝန်ထမ်းများသည် ရာဇဝတ်မှုများကို ကျူးလွန်နေကြသော ရာဇဝတ်ဂိုဏ်းသားများသာဖြစ်ကြောင်း တရားရေးဝန်ကြီးဌာနက ထုတ်ပြန် ကြေညာထားသည်။
