နားလည်မှုနှင့် စုစည်းညီညွတ်မှုကိုပို၍ ခိုင်မာအားကောင်းစွာတည်ဆောက်ပြီး တော်လှန်ရေး၏ အရေးကြီးသည့်အဆင့်များကို တော်လှန်ရေးအင်အားစုအသီးသီးနှင့် မဆုတ်မနစ်ရှေ့ဆက်ချီတက်သွားမည်ဟု အထွေထွေသပိတ်ပေါင်းစပ်ညှိနှိုင်းရေးအင်အားစု-GSCBက ထပ်လောင်းကတိပြုသည်။
တော်လှန်ရေးအဆက်ဆက်တွင် အသက်ပေးဆပ် စွန့်လွှတ်သွားကြသောသူရဲကောင်းများအား လေးစားဂုဏ်ပြုသောအားဖြင့် GSCB၏ ပထမအကြိမ်ညီလာခံက ယင်းသို့ အဓိဋ္ဌာန်ပြုခဲ့ခြင်း ဖြစ်သည်ဟု ဖော်ပြသည်။
စစ်အာဏာရှင်စနစ်အပါအဝင် အာဏာရှင်စနစ်မှန်သမျှကို အမြစ်ဖြတ်တွန်းလှန်ချေမှုန်းရေး၊ အနာဂတ်မြန်မာ့နိုင်ငံရေးတွင် စစ်တပ်မပါဝင်ရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်အပြည့်အဝရှိသော ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးတို့အတွက် ပြည်သူလူထုကို မျက်နှာမူမည်ဖြစ်ကြောင်းလည်း GSCBက ညီလာခံကြေညာစာတမ်း၌ ဖော်ပြသည်။
ယခု ၂၀၂၂၏ နေ့ရက်တိုင်းသည် တော်လှန်ရေးအတွက် လွန်စွာအရေးကြီးသည်ဖြစ်ရာ ကုလသမဂ္ဂ၊ ဥရောပနိုင်ငံများ၊ အမေရိကန်အပါအဝင် နိုင်ငံတကာအစိုးရများသည် အကြမ်းဖက်စစ်အုပ်စုကို လုံးဝအသိအမှတ်မပြုဘဲ ယခုထက်ပို၍ ပြတ်ပြတ်သားသား အရေးယူဆောင်ရွက်ကြရန် GSCBက တိုက်တွန်းသည်။
Public Service Announcement
မြန်မာနိုင်ငံပြည်သူလူထုကို ပိုမိုစာနာနားလည်သောအားဖြင့် မြန်မာ့နွေဦးတော်လှန်ရေးကို အဘက်ဘက်မှ ဝန်းရံပေးကြရန်နှင့် အာဆီယံအနေဖြင့်လည်း မြန်မာပြည်သူလူထု၏ တော်လှန်ရေးလိုအင်ဆန္ဒများအတွက် ပြတ်သားစွာ ရပ်တည်ဆောင်ရွက်ပေးရန် လိုအပ်ကြောင်း GSCB က တောင်းဆိုသည်။
ထို့အပြင် အကြမ်းဖက်စစ်အုပ်စု၏ ရွေးကောက်ပွဲလမ်းကြောင်းသည်လည်း မြန်မာနိုင်ငံအတွက် အဖြေမဟုတ်ကြောင်း နိုင်ငံတကာအစိုးရများကို GSCBက အသိပေးသည်။
အကြမ်းဖက်စစ်အုပ်စုကို ယနေ့အချိန်အထိ ကြံ့ကြံ့ခံဆန့်ကျင်နေသော ပြည်သူလူထုနှင့်အတူ နိုင်ငံတကာရောက် မြန်မာနိုင်ငံသားများအနေဖြင့် ဆက်လက်ရပ်တည်တိုက်ပွဲဝင်သွားကြရန် GSCBက အလေးအနက် တိုက်တွန်းသည်။
