စစ်ကောင်စီတပ်မှ သေဆုံးထိခိုက်များဟု ထုတ်ပြန်
မကွေးတိုင်း ရေစကြိုမြို့နယ်အတွင်း စစ်ကြောင်းထိုးလာသည့် စစ်ကောင်စီတပ်ကို ယမန်နေ့က တိုက်ခိုက်ခဲ့ရာ စစ်ကောင်စီတပ်မှသေဆုံးထိခိုက်များပြားခဲ့ကြောင်း ပြည်သူ့ကာကွယ်ရေးတပ်ဖွဲ့-တလုပ်(မြင်းခြံခရိုင် တပ်ရင်း – ၂)က ထုတ်ပြန်သည်။
ယမန်နေ့ (ဇွန်လ ၉ရက်) နံနက်ပိုင်းတွင် အင်အား ၁၀၀ ကျော်ပါသည့် စစ်ကောင်စီတပ်စစ်ကြောင်းသည် ရေစကြိုမြို့နယ် ဆင်ခြေယာရွာမှ ဇရပ်နီရွာသို့ စစ်ကြောင်းထိုးလာကြောင်း၊ အဆိုပါ စစ်ကြောင်းအား ဇရပ်နီရွာနှင့် ရွှေလုံရွာကြား အရောက်တွင် မဟာမိတ်ပူးပေါင်းတပ်ဖွဲ့က အနီးကပ်ခြုံခိုတိုက်ခိုက်ခဲ့ကြောင်း ဖော်ပြထားသည်။
စစ်ကောင်စီတပ် စစ်ကြောင်းသည် အလစ်အငိုက် တိုက်ခိုက်ခြင်းခံရပြီး ၀ရုဏ်းသုန်းကားဖြစ်ကာ ဂျန်ပါကြောင့် မကွဲသော မိုင်းကြိုးများအား တိုက်မိပြီး မိုင်း ၃လုံးကွဲပြီး စစ်ကောင်စီတပ်မှ သုံးဦးလဲကျခဲ့ကြောင်း၊ ထို့နောက် သက်ကွင်းအတွင်း ရောက်လာသော စစ်ကောင်စီတပ်များအား (၄၀)မမ လက်နက်ငယ်များဖြင့် ဆက်တိုက် ပစ်ခတ်ခဲ့ရာ စစ်ကောင်စီတပ်မှ ၁၂ဦးခန့် သေဆုံးခဲ့ပြီး အများအပြားထိခိုက်ဒဏ်ရာရရှိခဲ့ကြောင်း PDF – တလုပ်က သတင်းထုတ်ပြန်သည်။
ထို့နောက် စစ်ကောင်စီတပ်များက ပြန်လည်နေရာယူပြီး လက်နက်ကြီး၊ စနိုက်ပါ၊ စက်လက်များ အသုံးပြု တိုက်ခိုက်လာရာ လက်နက်အင်အားမမျှ၍ ဆုတ်ခွာခဲ့သည်ဟု ဆိုသည်။
Public Service Announcement
အပြန်အလှန် ပစ်ခတ်မှုအတွင်း မဟာမိတ် တပ်ပေါင်းစုဘက်က ရဲဘော်နှစ်ဦး ပေါင်နှင့်လက်တွင် လက်နက်ကြီး အစမှန်ဒဏ်ရာရရှိခဲ့ပြီး မစိုးရိမ်ရကြောင်း ဖော်ပြထားသည်။
အဆိုပါ စစ်ဆင်ရေးအား ပြည်သူ့ကာကွယ်ရေးတပ်ဖွဲ့-တလုပ်(မြင်းခြံခရိုင်တပ်ရင်း -၂) နှင့်အတူ MGN – RANGER ၊ MGN-TIGER၊MGN-21၊ MGN-35၊ Shwe-Ao Revolution Force-SARF၊ တောင်သာ PDF၊ ဗိုလ်ကျားသစ်အဖွဲ့ တို့ ပူးပေါင်းဆောင်ရွက်ခဲ့ခြင်းဖြစ်သည်ဟု အသိပေးထားသည်။
