မင်းတပ်တွင် ပြည်သူလူထုအခြေပြု စာသင်ကျောင်းများဖွင့်လှစ်ရေးအတွက် ဒေသခံပြည်သူများအစည်းအဝေးပြုလုပ်နေသည့်နေရာကို စစ်ကောင်စီတပ်က ယနေ့နံနက်ပိုင်းတွင်လေကြောင်းမှလာရောက်ဗုံးကျဲတိုက်ခိုက်ခဲ့ရာ အရပ်သား သုံဦးသေဆုံးပြီး ၁၁ဦးဒဏ်ရာရရှိခဲ့ကြောင်းဒေသခံများကပြောသည်။
ယနေ့(ဇူလိုင ၂)နံနက်၁၁နာရီခန့်ကမင်းတပ်မြို့ ချပ်ကျေးရွာမှစာသင်ကျောင်းတွင် အစည်းအဝေးပြုလုပ်နေစဥ် စစ်ကောင်စီတပ်မှလေယာဥ်နှစ်စီးကလာရောက်တိုက်ခိုက်ခြင်းဟု ဒေသခံများကပြောသည်။
“အမျိုးသားနှစ်ယောက်၊ အမျိုးသမီးတစ်ယောက်သေဆုံးတယ်။၁၁ယောက် ဒဏ်ရာရတယ်။အဲ ဒါတောင် ပစ်မှတ်က လွဲလို့။ မဟုတ်ရင် ရာချီသေမှာ” ဟု ယင်းဖြစ်စဥ်ကိုမြင်တွေ့ခဲ့သည့် ဒေသခံ ကျောင်းသားမိဖတစ်ဦးကပြောသည်။ ၎င်ူကိုယ်တိုင်လည်း ကျောင်းများဖွင့်လှစ်ရေးအစည်းတက်ရန် သွားနေစဥ် လမ်းတစ်ဝက်အရောက်၌ ဗုံးကျဲတိုက်ခိုက်မှုဖြစ်ပွားခဲ့ခြင်းဖြစ်သည်ဟု၎င်းကဆက်ပြောသည်။
စစ်ကောင်စီသည် မိနစ်ပိုင်းအတွင်း လေကြောင်းမှ နှစ်ကြိမ်လာရောက် ဗုံးကျဲပစ်ခတ်တိုက်ခိုက်ခဲ့ခြင်းဖြစ်ပြီး ကလေးငယ်များအပါအဝင် ဒေသခံပြည်သူများ ဝရုန်းသုန်းကားဖြင့်ထွက်ပြေးခဲ့ကြရသည်ဟု ဒေသခံများကပြောသည်။
Public Service Announcement
သေဆုံးသူ သုံးဦးအနက် နှစ်ဦးသည် နေရာတွင် သေဆုံးခဲ့ပြီး ဒဏ်ရာပြင်းထန်သူ တစ်ဦးသည် ညနေဘက်တွင်ဆေးကုသနေစဥ် သေဆုံးသွားခဲ့ခြင်းဖြစ်သည်။ ဒဏ်ရာရသူ ၁၁ဦးသည် ဆေးကုသမှုခံယူနေဆဲဟု သတင်းရရှိသည်။
မင်းတပ်မြို့နယ် ပြည်သူ့အုပ်ချုပ်ရေးအဖွဲ့ သတင်းပြန်ကြားရေးဌာနကလည်းချင်းပြည်နယ် မင်းတပ်မြို့နယ်အတွင်းရှိ ကျေးရွာ နှစ်ရွာကို စစ်ကောင်စီတပ်က ယနေ့လေကြောင်းမှဗုံးကြဲတိုက်ခိုက်ခဲ့၍ ဒေသခံပြည်သူနှစ်ဦးသေဆုံးပြီးအများအပြားဒဏ်ရာရရှိခဲ့ကြောင်း ယနေ့နေ့ခင်းပိုင်းတွင်ထုတ်ပြန်သည်။
ဇူလိုင် ၂ရက်နံနက် ၁၁နာရီ ဝန်းကျင်၌ စစ်ကောင်စီတပ်က ဗုံးကြဲလေယာဉ်နှစ်စီးဖြင့် ဗုံးကြဲတိုက်ခိုက်လာခြင်းဖြစ်သည်ဟု ဖော်ပြသည်။
“စာသင်ကျောင်း၊ ဘုရားကျောင်းတို့ကိုအပြာရောင်ဂျက်လေယာဉ် ၂စီးဖြင့် လာရောက်ဗုံးကြဲသွားခြင်းဖြစ်သည်”ဟု ထုတ်ပြန်ချက်၌ ဖော်ပြထားသည်။
မင်းတပ်မြို့နယ်တွင် ပြီးခဲ့သည့် ရက်ပိုင်းအတွင်းက တိုက်ပွဲဖြစ်ပွားခဲ့သော်လည်း ယနေ့တွင် တိုက်ပွဲမရှိဘဲစစ်ကောင်စီတပ်ကဗုံးလာကျဲခဲ့ခြင်းဖြစ်သည်။
