ဖြည့်ဆည်းရေးစင်တာတာဝန်ခံ ကိုအာကာမိုးကိုကိုသည် ရုံးမှအပြန်ကားတံခါးဖွင့်တွင် ပစ္စည်းလုယူခံရသည့်အပြင် ရိုက်နှက်သတ်ဖြတ်ခြင်းခံခဲ့ရကြောင်း Mercury Online Shopping Mall မှ ယနေ့(ဇူလိုင် ၇)အသိပေး ထုတ်ပြန် သည်။
ကိုအာကာမိုးကိုကိုသည် ယမန်နေ့ညနေပိုင်းက ရုံးကား(Suzuki Pickup) မောင်းနှင်၍ အိမ်ပြန်လာရာ မသမာသူနှစ်ဦးခန့်မှ ကားတံခါးဖွင့်တက်လာပြီး ပစ္စည်းလုရာ အသာတကြည်မပေးသဖြင့် ထိုးကြိတ်ရိုက်နှက် သတ်ဖြတ်သွားပြီး ကားရော လူပါ လှိုင်သာယာလမ်းဘေးတစ်နေရာတွင် စွန့်ပစ်ထားခဲ့သည်ဟု ဖော်ပြသည်။
ထိုဖြစ်စဥ်ကြောင့် ကိုအာကာမိုးကိုကိုထံမှ အိုင်ဖုန်း(၁၃)တစ်လုံး၊ ရုံးပစ္စည်း ASUS M4 13 DA လတ်တော့တစ်လုံးနှင့် ငွေကျပ်လေးသိန်း လုယူခြင်းခံလိုက်ရသည်ဟု ဆိုသည်။
“အမှုမှန်ပေါ်ပေါက်ပြီးကျူးလွန်သူများ အမြန်ဆုံးဖမ်းဆီးနိုင်ရေး သိရှိပါက သတင်းပေးနိုင်ပါရန်နှင့် အထက်ဖော်ပြပါပစ္စည်းများလာရောင်းချခဲ့ပါက ကူညီပြီးသတင်းပေးပေးပါရန် မေတ္တာရပ်ခံအပ်ပါသည်”ဟု Mercury Online Shopping က အသိပေးသည်။
Public Service Announcement
လှိုင်သာယာမြို့နယ် လမ်းဘေးတစ်နေရာ၌ စွန့်ပစ်ထားခဲ့သော ကိုအာကာမိုးကိုကိုမောင်းနှင်ခဲ့သည့်ယာဥ်ပေါ်တွင် ၎င်း၏ရုပ်အလောင်အပြင် ယင်အတွင်းပိုင်း၌ အဝတ်စုပ်နှင့် ကွမ်းတံတွေးများကိုတွေ့ရပြီး သေဆုံးသွားသူမှာ ဆေးလိပ်သောက်ခြင်း၊ ကွမ်းစားခြင်းပြုလုပ်တတ်သူမဟုတ်ကြောင်း ထုတ်ပြန်ချက်တွင် ဖော်ပြသည်။
Mercury Online Shopping မှ ဝန်ထမ်းတစ်ဦးဖြစ်သည့် ကိုအာကာမိုးကိုကိုသည် သေဆုံးချိန်တွင် အသက် ၂၃ နှစ်ရှိပြီဖြစ်ပြီး ဇူလိုင် ၉ရက်တွင် ရေဝေးသုဿာန်၌ ဂူးသွင်းသဂြိုဟ်မည်ဖြစ်ကြောင်း ကျန်ရစ်သူမိသားစုက အသိပေးထားသည်။
