ရန်ကုန်မြို့ တာမွေမြို့နယ်တွင် အကြမ်းဖက်စစ်ကောင်စီယာဥ်ကို ဖောက်ခွဲတိုက်ခိုက်ရန်စီစဉ်ထားသော ဗုံးကို အမှိုက်ကောက်သူတစ်ဦးက ကိုင်ကြည့်ရာမှ ဝိုင်း၍ ကြည့်ရှုနေသောကြောင့် ပြည်သူများထိခိုက်မှုမရှိစေရန် မစ်ရှင်ဖျက်ခဲ့ရကြောင်း Yangon Liberation Force (YLF)အဖွဲ့က ပြောသည်။
ဇူလိုင် ၁၂ ရက် နေ့လည် ၁၁နာရီခွဲခန့်တွင် တာမွေမြို့နယ် အောင်မင်္ဂလာလမ်းထိပ်၌ စစ်ကောင်စီကားများကို ဖောက်ခွဲရန် Urban Revolutionary Front (URF) အဖွဲ့နှင့်ပူးပေါင်းစီစဉ်ခဲ့ခြင်းဖြစ်ကြောင်း သတင်းထုတ်ပြန်ထားသည်။
“အသက် ၂၇ နဲ့ ၃၅ ကြားရှိမယ့် အမှိုက်ကောက်တဲ့ တစ်ယောက်က ကိုင်ကြည့်တယ်။ ဖွင့်ကြည့်တယ်။ ပြီးတော့ စက်ဘီးနဲ့ လူတစ်ယောက်ရောက်လာတယ် ။ အဲဒီလူက သတင်းပေးလို့ယူဆရတယ်။ သူကဖုန်းဆက်ပြီး ခေါ်လိုက်တာ ခွေးတွေကို “ဟု YLF မှ တာဝန်ရှိသူတစ်ဦးကပြောသည်။
ထို့ပြင် ယင်းနေရာသို့ မဆိုင်သူများကလည်း လာရောက်ကြည့်ရှုခဲ့သောကြောင့် ပြည်သူများ ထိခိုက်မှုမရှိစေရန် မစ်ရှင်ကို ဖျက်ခဲ့ခြင်းဖြစ်သည်ဟု ၎င်းက ဆိုသည်။
အဆိုပါဗုံးများကို စစ်ကောင်စီတပ်ဖွဲ့ဝင်များက ဖောက်ခွဲဖျက်ဆီးခဲ့ကြောင်း မင်္ဂလာတောင်ညွှန့်မြို့နယ်၌ နေထိုင်သူတစ်ဦးက ပြောသည်။
“ပထမတစ်လုံးက သဲအိတ်တွေနဲ့ ဖုံးပြီးဖောက်တာ နောက်တစ်လုံးကျ အမှိုက်ပုံးထဲတင် ဖောက်လိုက်တာဖြစ်မယ်”ဟု ၎င်းက ဆိုသည်။
စစ်ဆင်ရေးများပြုလုပ်ရန်အတွက် အချိန်၊ငွေကြေးနှင့် ပြည်သူ့ကာကွယ်ရေးတပ်ဖွဲ့ဝင်များ၏ အသက်များပါ ရင်းနှီးထားရသောကြောင့် မစ်ရှင်ဖျက်ရပါက ဆုံးရှုံးနစ်နာမှုများစွာရှိပြီး ပြည်သူများအနေဖြင့် ဗုံးတွေ့ပါက စပ်စုခြင်း၊ ဝိုင်း၍ ကြည့်ရှုခြင်းများမပြုလုပ်ဘဲ တော်လှန်ရေး၌ ပါဝင်ပေးကြရန် YLF မှ တာဝန်ရှိသူက မေတ္တာရပ်ခံသည်။
ပြည်သူ့ကာကွယ်ရေးတပ်ဖွဲ့များက မိမိနှင့်မသက်ဆိုင်သည့် ပစ္စည်းများကို ကိုင်တွယ်ခြင်းမပြုလုပ်ရန် အကြိမ်ကြိမ်မေတ္တာရပ်ခံခဲ့သော်လည်း ပြည်သူများဘက်က ပူးပေါင်းပါဝင်မှုမရှိသောကြောင့် ယခင်ကလည်း မစ်ရှင်များဖျက်ခဲ့ရသည့် ဖြစ်စဉ်များရှိသည်။