တောင်သာမြို့နယ်တွင် စစ်ကောင်စီ၏ ရဲအချင်းချင်းပစ်ခတ်မှုဖြစ်ပွားပြီး တစ်ဦးသေ၊ အမျိုးသမီးတစ်ဦး လက်ပြတ်ဟုဆို

မန္တလေးတိုင်း၊ မြင်းခြံခရိုင်၊ တောင်သာမြို့နယ်တွင် အကြမ်းဖက်စစ်ကောင်စီ၏ ရဲအချင်းချင်းပစ်ခတ်မှုဖြစ်ပွားပြီး တစ်ဦးသေဆုံးကာ အမျိုးသမီးတစ်ဦး လက်ပြတ်သွားကြောင်း ဒေသတွင်းသတင်းရင်းမြစ်များက ပြောသည်။

ယနေ့ (ဇူလိုင် ၁၅ရက်) ညနေ ၃နာရီမိနစ် ၄၀ခန့်က တောင်သာမြို့နယ် ရုံးစည်ကြီးနယ်မြေရဲစခန်းတွင် ရဲတပ်သားလင်မယားနှစ်ဦး စကားများရန်ဖြစ်ရာမှ သေနတ်နှင့်ပစ်ခတ်မှုဖြစ်ပွားခဲ့သည်ဟု လူထုလှုပ်ရှားမှုကော်မတီ – တောင်သာ၏ ထုတ်ပြန်ချက်တွင် ဖော်ပြ သည်။

အရက်မူးလာသော ရဲတပ်သား ရန်နိုင်ဦးမှ မိန်းမဖြစ်သူနှင့်စကားများရန်ဖြစ်ခဲ့ရာ သေနတ်ဖြင့် ပစ်ခတ်ခဲ့သည်။ ထိုစဥ် ဝင်ရောက်ဟန့်တား​သော ရဲတပ်သား အောင်ခိုင်ဝင်းဆိုသူအား ရင်ဘတ်နှစ်ချက် ကျည်ဖောက်ဝင်ခဲ့ပြီး မိန်းမဖြစ်သူလည်း လက်မောင်းထိမှန်ကာ လက်တစ်ဖက် ပြတ်ကျခဲ့သည်ဟု ဆိုသည်။

သေနတ်ဒဏ်ရာထိမှန်သော ရဲသားလည်း သေဆုံးသွားကြောင်း လူထုလှုပ်ရှားမှုကော်မတီ-တောင်သာက အသိ ပေးထားသည်။

Public Service Announcement

အထက်ပါဖြစ်စဥ်နှင့် ပတ်သက်၍ People’s Spring သတင်းဌာနအနေဖြင့် ထပ်မံအတည်ပြုနိုင်ခြင်း မရှိသေးပေ။