အကြမ်းဖက်အုပ်ချုပ်သူများရန်မှ ပြည်သူတစ်ရပ်လုံးလွတ်မြောက်ရေး ရဲ့ဝင့်စွာ တိုက်ပွဲဝင်ရန် KNDOနေ့သို့ KNU သဝဏ်လွှာပို့ တိုက်တွန်း

သမိုင်းဝင်ရန်သူဖြစ်သော မဟာလူမျိုးကြီးဝါဒနှင့် အာဏာသိမ်းစစ်အုပ်စုကို အဆုံးခန်းတိုင် ဖြိုချ ဖျက်ဆီးရမည်ဟုဖော်ပြ

ကရင်အမျိုးသားနှင့် ပြည်သူလူထုတစ်ရပ်လုံး အကြမ်းဖက် အုပ်ချုပ်သူများ၏ မတရားစော်ကား မှုများ သတ်ဖြတ်မှုများနှင့် ရပ်ရွာများအား မီးရှို့ ဖျက်ဆီးခြင်းတို့မှ လွတ်မြောက်ပြီး အသက်၊ အိုးအိမ်စည်းစိမ် လုံခြုံမှုများအတွက် အတူတကွ ကြိုးပမ်းတိုက်ပွဲဝင်ကြပြီး ကရင်အမျိုးသားများ၏ နိုင်ငံရေး ရည်မှန်း ချက် နှင့် ပြည်သူလူထု တစ်ရပ်လုံး၏ ရည်မှန်းချက်များ ပြီးမြောက်အောင်မြင်သည်အထိ ရဲရဲ ဝံ့ဝံ့တိုက်ပွဲဝင်ကြရန် ကရင်အမျိုးသားကာကွယ်ရေး တပ်ဖွဲ့(KNDO) ထံ ကရင်အမျိုးသား အစည်းအရုံး(KNU)ကသဝဏ်လွှာပေးပို့ တိုက်တွန်းသည်။

ယနေ့ (ဇူလိုင် ၁၆ရက်) ကျရောက်သည့် ၇၅နှစ်ပြည့် KNDOနေ့သို့ KNUက သဝဏ်လွှာပေးပို့ခဲ့ ခြင်းဖြစ်သည်။

ယခု လက်ရှိဖြစ်ပေါ်နေသော နိုင်ငံရေး အခင်းအကျင်းသည် ကရင်အမျိုးသား တို့၏ နိုင်ငံရေး ရပ်တည်ချက်များနှင့် ကရင့်အမျိုးသားတော်လှန်ရေး၏ အနာဂတ်လမ်းစဉ်အတွက် စိန်ခေါ်မှုများနှင့် ရင်ဆိုင်နေရသော အချိန်ဖြစ်ကြောင်း သဝဏ်လွှာ၌ ဖော်ပြသည်။

ကရင်အမျိုးသားတို့ သမိုင်းတစ်လျှောက် ရင်ဆိုင်နေသော ရန်သူသည် လူမျိုးကြီး ဝါဒနှင့် အာဏာသိမ်း စစ်အုပ်စုဖြစ်ပြီး ၎င်းတို့သည် ကရင်အမျိုးသားများနှင့် လူနည်းစုများ၏ မျှော်မှန်းချက်၊ တစ်နိုင်ငံလုံးရှိ ပြည်သူလူထု၏ လိုလားတောင့်တနေကြသော လွတ်လပ်မှု၊ တန်းတူမှုနှင့် ကိုယ်ပိုင်ပြဌာန်းခွင့် ကိုယ်ပိုင် အုပ်ချုပ်ခွင့်များတို့ကို အာမခံချက် ပေးနိုင်သည့် ဖက်ဒရယ် ဒီမိုကရေစီ စနစ်ကို ဆန့်ကျင်တိုက်ခိုက်နေကြောင်း KNUက ဆိုသည်။

Public Service Announcement

ယနေ့တွင် တိုင်းရင်းသားပြည်သူလူထု တစ်ရပ်လုံးသည် အာဏာသိမ်းစစ်အုပ်စု ကို ဘက်ပေါင်းစုံမှ နည်းလမ်း အမျိုးမျိုးဖြင့် ပါဝင်တော်လှန်နေကြကြောင်း၊ ထို့ကြောင့် ယခုကဲ့သို့သော အချိန်ကာလတွင် မိမိတို့၏ နိုင်ငံရေး ရပ်တည်ချက်နှင့်တူညီသော အဖွဲ့အစည်းအားလုံးနှင့် အတူတကွ လက်တွဲပြီး ကရင်အမျိုးသားများ၏ သမိုင်းဝင် ရန်သူဖြစ်သော မဟာလူမျိုးကြီး ဝါဒနှင့် အာဏာသိမ်းစစ်အုပ်စုကို အဆုံးခန်းတိုင် ဖြိုချ ဖျက်ဆီး ပစ်ရပါမည်ဖြစ်ကြောင်း KNU၏ သဝဏ်လွှာ၌ ဖော်ပြထားသည်။

တချိန်တည်းမှာပင် ထိုကဲ့သို့ ကြိုးပမ်းတိုက်ပွဲဝင်နေကြသည့် အချိန်တွင် KNDO မှ ခေါင်းဆောင်များနှင့် စစ်သည်တော်များ အနေဖြင့် မိမိတို့ ခေါင်းဆောင်ကြီးများ၏ နိုင်ငံရေး ဦးဆောင်မှုနှင့် လမ်းညွှန်ချက် အတိုင်း မိမိတို့ အမျိုသားနှင့် ပြည်သူလူထု၏ ရည်မှန်းချက် ပန်းတိုင်သို့ ရောက်ရှိစေရန် ကြိုးပမ်း ကြရမည် ဖြစ်ပြီး ထိုကဲ့သို့ ထမ်းဆောင်ကြရာတွင် တော်လှန်ရေးသတိ နှင့် နိုင်ငံရေးနိုးကြားမှုများလည်း ရှိရမည်ဖြစ်ကြောင်း သဝဏ်လွှာ၌ ပါရှိသည်။

ယခုလက်ရှိကာလသည် မိမိတို့၏ နိုင်ငံရေးပန်းတိုင်ကို ဆက်လျှောက်နေရသော အချိန်ဖြစ်သော ကြောင့် စုစုစည်းစည်း လက်တွဲလုပ်ဆောင်ကြပြီး ရည်မှန်းချက် တစ်ခုတည်းဖြင့် အပြန်အလှန် နားလည်မှုရှိရှိ ကရင်အမျိုးသားများ၏ ရည်မှန်းချက် ပန်းတိုင်သို့ ရောက်ရှိကြသည်အထိ လက်တွဲလုပ်ဆောင်ကြရမည် ဖြစ်ကြောင်း KNUက သဝဏ်လွှာပေးပို့သည်။