အကြမ်းဖက်စစ်တပ်၏ အာဏာတည်မြဲရေးအတွက် ဒီမိုကရေစီ လိုလားသူများ အပေါ် ရက်စက်ကြမ်း ကြုတ်ပြီး ဥပဒေမဲ့လုပ်ရပ်များ လုပ်ဆောင်နေခြင်းအပေါ် ပြင်းထန်စွာ ကန့်ကွက်ရှုံ့ချကြောင်း တအာင်း နိုင်ငံရေးအတိုင်ပင်ခံကော်မတီ(TPCC)ကထုတ်ပြန်လိုက်ပြီး ပြည်သူလူထုတစ်ရပ်လုံးနဲ့ပူးပေါင်းကာ နွေဦးတော်လှန်ရေးအင်အားစုတွေနဲ့အတူ အကြမ်းဖက်စစ်အုပ်စုနဲ့ အာဏာရှင်စနစ်ဟူသမျှ အမြစ်ပြတ် ကျဆုံးသည်အထိ တော်လှန်တိုက်ပွဲဝင်သွားမည်ဟု ဖော်ပြခဲ့သည်။
အကြမ်းဖက်စစ်တပ်က ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့ကို မတရားသေဒဏ်စီရင်ချမှတ်ခြင်းအပေါ် TPCCက သဘောထား ကြေညာချက် ထုတ်ပြန်ခဲ့ခြင်းဖြစ်သည်။
၎င်းတို့လေးဦးကို ပြစ်ဒဏ်စီရင်ဆောင်ရွက်ပြီးဖြစ်ကြောင်း ကြားသိရသည့်ပေါ် များစွာ ထိတ်လန့်တုန်လှုပ်မိကြောင်း TPCCက ထုတ်ပြန်ခဲ့သည်။
အကြမ်းဖက်စစ်အုပ်စု၏ မတရား သတ်ဖြတ်မှုသည် ဖက်ဒရယ်ဒီမိုကရေစီနိုင်ငံတည် ဆောက်ရေးနှင့် ငြိမ်းချမ်းရေး ဖော်ဆောင်လိုသည့် စိတ်ဆန္ဒမရှိသည့်အပြင် ပြည်သူလူထုကို ရန်သူသဖွယ် သဘောထားပြီး အကြောက်တရားများနှင့် ဖိနှိပ်သည့် ဖက်ဆစ်ဝါဒနှင့် အာဏာရှင်တို့၏ သရုပ်သဏ္ဍာန်အမှန်ကို ဖော်ပြခြင်းဖြစ်သည်ဟု ဖော်ပြထားသည်။
Public Service Announcement
နိုင်ငံတကာအသိုင်းအဝိုင်းနှင့်အိမ်နီးချင်းနိုင်ငံများ၏သံတမန်ရေးရာအရ တောင်းဆိုချက်များကို မထီမဲ့မြင် လျစ်လျူရှုကာ မတရားသေဒဏ်စီရင်ခြင်းသည် မြန်မာပြည်သူထုတစ်ရပ်လုံး သာမက နိုင်ငံတကာအသိုင်းအဝိုင်းများကိုပါ ပြောင်ပြောင်တင်းတင်း စိန်ခေါ်လိုက်ခြင်းဖြစ်ကြောင်းဖော်ပြထားသည်။ ထို့ကြောင့် နောက်ဆက်တွဲဖြစ်ပေါ်လာမည့် တုန့်ပြန်ချက်များနှင့် ပြည်သူလူထု၏ ခုခံတော်လှန်မှုများ ပိုမိုကြီးထွားလာစေရန် နှိုးဆော်လိုက်ခြင်းဖြစ်သည်ဟု TPCCကထုတ်ပြန်သည်။
အကြမ်းဖက်စစ်တပ်၏ရာဇဝတ်မှုကျူးလွန်မှုနှင့်အကြမ်းဖက်လုပ်ရပ်များသည် အနာ ဂတ်ဖက်ဒရယ် ဒီမိုကရေစီ နိုင်ငံတော်တည်ဆောက်ရေးနှင့်မြန်မာ့နိုင်ငံရေးပြုပြင် ပြောင်းလဲမှုများ၌များစွာအဟန့်အတားဖြစ်စေကြောင်း ဖော်ပြထားသည်။
