အတိုက်အခံတက်ကြွလှုပ်ရှားသူ ၄ ဦးကို ကွပ်မျက်တဲ့စစ်ကောင်စီရဲ့လုပ်ရပ်ဟာ အာဆီယံကို မလေးစားကြောင်းရှင်းရှင်းလင်းလင်းပြသနေတာလို့ စင်ကာပူနိုင်ငံခြားရေးဝန်ကြီး ကပြောလိုက်ပါတယ်။
ဒီနေ့ကမ္ဘောဒီးယားနိုင်ငံ ၊ဖနွမ်းပင်မှာ အာဆီယံနိုင်ငံခြားရေးဝန်ကြီးများအဆင့်အစည်းအဝေးကိုကျင်းပခဲ့ပြီး မြန်မာ့နိုင်ငံရဲ့အခြေအနေကိုထည့်သွင်းဆွေးနွေးခဲ့ကြပါတယ်။
အဲဒီဆွေးနွေးမှုမှာ အာဆီယံဘုံသဘောတူညီချက် ၅ ချက်ကိုစစ်ကောင်စီက ဖော်ဆောင်ဖို့ပျက်ကွက်တာ ၊ ပြီးခဲ့တဲ့ ရက်ပိုင်းက စစ်ကောင်စီရဲ့သေဒဏ်စီရင်မှုတွေဟာ အာဆီယံက ကြိုးပမ်းနေတဲ့ ငြိမ်းချမ်းစွာ အဖြေရှာရေးနဲ့ အမျိုးသားပြန်လည်သင့်မြတ်ရေး ကြိုးပမ်းမှုတွေကို နောက်ပြန်ဆုတ်သွားစေကြောင်း ထည့်သွင်းဆွေးနွေးခဲ့ကြတယ်လို့ စင်ကာပူနိုင်ငံခြားရေးဝန်ကြီးက ဆိုထားပါတယ်။
ဒီလိုကွပ်မျက်မှုဟာ အာဆီယံအပေါ် စစ်ကောင်စီက မလေးစားကြောင်း ထင်ဟပ်စေတယ်လို့ စင်ကာပူနိုင်ငံခြားရေးဝန်ကြီးက အစည်းအဝေးမှာဆွေးနွေးခဲ့ပါတယ်။
Public Service Announcement
အာဆီယံအနေနဲ့တော့ မြန်မာ့အရေးအတွက် နှောင့်နှေးနေမှာမဟုတ်ဘဲ ဆက်လက်လုပ်ဆောင်သွားမယ်လို့လည်းပြောပါတယ်။
ကုလသမဂ္ဂရေးရာကျွမ်းကျင်သူတွေနဲ့ဖွဲ့စည်းထားတဲ့ မြန်မာနိုင်ငံဆိုင်ရာအထူးအကြံပေးကောင်စီ (SAC- M)က စစ်ကောင်စီကို သံတမန်နည်းလမ်းနဲ့ ဆက်ဆံလိုမရသလို အာဆီယံနဲ့ ကုလသမဂ္ဂဟာလည်း မြန်မာပြည်သူတွေအပေါ် တာဝန်မကျေဘူးလို့ပွင့်ပွင့်လင်းလင်းဝေဖန်ထားပါတယ်။
စစ်ကောင်စီကို ထိရောက်တဲ့ဖိအားပေးအရေးယူမှုတွေလုပ်သင့်တယ်လို့တိုက်တွန်းထားကြပါတယ်။
မြန်မာ့အရေးဖြေရှင်းဖို့အတွက်ချမှတ်ထားတဲ့ အာဆီယံ ဘုံသဘောတူညီချက်တွေကို စစ်ကောင်စီက မလိုက်နာတဲ့အတွက် နည်းလမ်းသစ်ကိုလည်းစဉ်းစားသင့်ကြောင်း SAC-M အကြံပြုထားပါသေးတယ်။
