ဖာပွန်ခရိုင်မှာ နယ်ခြားစောင့်တပ်(BGF)က ဒေသခံအရပ်သားတစ်ဦးကို သတ်ဖြတ်ခဲ့ပြီး စစ်ကောင်စီတပ်ကလည်း ကျေးရွာတွေကို လက်နက်ကြီးနဲ့ ပစ်ခတ်ခဲ့တယ်လို့ ကေအဲန်ယူ-မူတြော်သတင်းစဉ်မှာ ဖော်ပြထားပါတယ်။
ဩဂုတ်(၁)ရက်က ဖာပွန်ခရိုင် ကတိုင်တိဒေသအနားက ကုလားကုန်းရွာသား အသက်(၃၅)နှစ်အရွယ်ရှိတဲ့ အမျိုးသားတစ်ဦးကို နယ်ခြားစောင့်တပ်(BGF-၁၀၁၃)က သတ်ဖြတ်လိုက်ပြီး မိသားစုတွေကို အသိပေးအကြောင်းမကြားဘဲ ယွန်းစလင်းချောင်းထဲမှာ စွန့်ပစ်မျောချခဲ့လိုက်တယ်လို့ မူတြော်သတင်းစဉ်က ဆိုပါတယ်။
ဒါ့အပြင် ဇူလိုင်(၃၁)ရက် ည ၁၀ နာရီအချိန်ခန့်က မထောအခြေစိုက် စစ်ကောင်စီရဲ့ ခမရ(၄၀၇)တပ်ရင်းက မထောကျေးရွာအုပ်စု သာမစူလော်ကျေးရွာထဲကို အမြောက်လက်နက်ကြီး(၉)လုံး တမင်ရည်ရွယ်ပြီးပစ်ခတ်ခဲ့သလို ဃော်ကလားကျေးရွာထဲကိုလည်း လက်နက်ကြီး(၇)လုံး ပစ်ချခဲ့တယ်လို့ သိရပါတယ်။
ဒေသတွင်းသတင်းရင်းမြစ်အဆိုအရ စစ်ကောင်စီရဲ့ စကစ(၈)လက်အောက်ခံ ခမရ(၄၀၇) တပ်ရင်းနဲ့ BGF-၁၀၁၃ တပ်ရင်းက တပ်ဖွဲ့ဝင်တွေဟာ အပြစ်မဲ့အရပ်သားပြည်သူတွေကို နည်းမျိုးစုံနဲ့ အကြပ်ကိုင်ခြိမ်းခြောက်နေမြဲရှိတယ်လို့ ကေအဲန်ယူ-မူတြော်သတင်းစဉ်ရဲ့ ဖော်ပြချက်ကနေ သိရပါတယ်။
Public Service Announcement
