ရန်ကုန်မြို့ ဒဂုံမြို့သစ်မြောက်ပိုင်းမြို့နယ် (၃၇)ရပ်ကွက် မြို့နယ်လျှပ်စစ်မန်နေဂျာရုံးအနီးရှိ စစ်ကောင်စီတပ် ကင်းတဲအား အဝေးထိန်းမိုင်းများဖြင့် ဖောက်ခွဲတိုက်ခိုက်ခဲ့ကြောင်း Generation Z Defence Force & Supply Army(GZDF)က ယနေ့(သြဂုတ် ၅)ထုတ်ပြန်သည်။
ယမန်နေ့ (သြဂုတ် ၄ ရက်)ည ၁၁ နာရီ ၁၀မိနစ်ခန့်တွင် မြောက်ဒဂုံ (၃၇)ရပ်ကွက် ပြည်ထောင်စုလမ်းမကြီးပေါ်ရှိ လျှပ်စစ်မီတာရုံးဘေးမှ စစ်ကောင်စီတပ်ကင်းတဲကို အဝေးထိန်းမိုင်းသုံးလုံးဖြင့် ဖောက်ခွဲခဲ့ရာ ရာသီဥတုအခြေအနေကြောင့် တစ်လုံးသာပေါက်ကွဲသွားကြောင်း ဖော်ပြသည်။
“သေဆုံးနိုင်မှုတော့ အတိအကျမသိရပါဘူးဗျ။ ကင်းမှာစခရှိနေတော့ သူတို့အနား မရောက်တရောက်မှာချပြီး ခွဲတာပါ”ဟု GZDF မှ တော်လှန်ရေးရဲဘော်တစ်ဦးက လူထုနွေဦးသို့ ပြောသည်။
အဆိုပါ စစ်ကောင်စီတပ်ကင်းတဲတွင် နံနက်ပိုင်းအချိန်များ၌ စစ်ကောင်စီတပ်သား သုံးဦးထက်မနည်းတွေ့ရ တတ်ပြီး ယမန်နေ့ညတိုက်ခိုက်ချိန်တွင် အင်အားမည်မျှရှိနေသည်ကို သေချာမသိရကြောင်း ၎င်းရဲ့ဘော်က ဆက်ပြောသည်။
Public Service Announcement
အထက်ပါတိုက်ခိုက်မှုတွင် စစ်ကောင်စီတပ်မှ ထိခိုက်သေးဆုံးအခြေအနေအား မသိရသေးသော်လည်း တော်လှန်ရေးရဲဘော်များ ဘေးကင်းလုံခြုံသည့်နေရာသို့ ရောက်ရှိပြီဖြစ်ကြောင်း အသိပေးသည်။
ယင်းဖောက်ခွဲတိုက်ခိုက်မှုကို Human Right Defenders နှင့် GenerationZ defence Force & Supply Army ပူးပေါင်းအဖွဲ့မှ တိုက်ခိုက်ခဲ့ခြင်းဖြစ်ကြောင်း ထုတ်ပြန်ထားသည်။
အလားတူ ယမန်နေ့(သြဂုတ် ၄)ည ၇ နာရီခွဲခန့်ကလည်း မြောက်ဥက္ကလာပမြို့နယ် ရွှေပေါက္ကံမြို့သစ်ရှိ စစ်ကောင်စီလက်အောက်ခံ ရဲစခန်းတစ်ခုကို ရန်ကုန်ပြောက် ကျားတပ်ဖွဲ့တစ်ခုမှ ဗုံးနှစ်လုံးဖြင့် ပစ်ခတ် တိုက်ခိုက်ခဲ့သေးသည်။
