●စစ်အုပ်စုအာဏာမသိမ်းခင်ကနှင့်ယှဥ်လျှင် ငွေလဲနှုန်းအရ ကျပ်ငွေတန်ဖိုး ၁၁၃ ရာခိုင်နှုန်းကျဆင်းသွား
ပြည်တွင်း၌ ယနေ့ရွှေတစ်ကျပ်သားလျှင် ၂၆သိန်းကျော်၊ အမေရိကန်တစ်ဒေါ်လာကို ၂၈၅၀ကျပ်အထိပေါက်ဈေးရှိလာပြီး ဈေးကွက်အတွင်း ရွှေနှင့်ဒေါ်လာဝယ်ယူမရတော့ကြောင်း ပြည်တွင်းရွှေဆိုင်ပိုင်ရှင်များနှင့် ငွေလဲဆောင်ရွက်နေသူများကပြောသည်။
သြဂုတ် ၁၂ ရက်တွင် ပြည်တွင်းရွှေဈေးမှာအခေါက်ရွှေတစ်ကျပ်သားလျှင် ကျပ် ၂၆ သိန်းကျော်( ၂,၆၂၀,၀၀၀)အထိဆက်တက်လာပြီး ဒေါ်လာဈေးမှာလည်း တစ်ဒေါ်လာလျှင် ၂၇၉၀ကျပ်မှ ၂၈၅၀ကျပ်အထိရှိနေသည်ဟု ဈေးကွက်အတွင်းမှာ သိရသည်။
“အခုက လူတွေ စိတ်ပူတာရယ်၊ မြန်မာကျပ်ငွေ ခိုင်မာမူမရှိတော့ရယ်၊ဝယ်လိုအားများနေတာရယ်၊နိုင်ငံရေးတွေကြောင့်အခုလို့ ဈေးတွေတက်နေတာ။ ရှေ့ဆက်လည်းတက်ဖို့ပဲရှိနေမှာ”ဟု ငွေလဲကောင်တာပိုင်ရှင်တစ်ဦးကပြောသည်။
ယနေ့ပေါက်ဈေးနှုန်းများသည့် ယမန့်နေ့(ဩဂုတ် ၁၁ရက်) ဈေးနှုန်းများဖြင့် နှိုင်းယှဉ်ပါက ရွှေတစ်ကျပ်သားလျှင်ကျပ် တစ်သိန်းနှင့် တစ်ဒေါ်လာကို ကျပ် ၁၂၀ ခန့်မြင့်တက်လာခြင်းဖြစ်သည်။ ယမန့်နေ့က အခေါက်ရွှေတစ်ကျပ်သားလျှင် ကျပ် ၂,၅၂၀,၀၀၀ နှင့် တစ်ဒေါ်လာကို ကျပ် ၂၇၃၀ ကျပ်ရှိခဲ့သည်။ ထိုကြောင့် တစ်ရက်အတွင်းရွှေဈေးမှာ တစ်ကျပ်သားလျင် ကျပ်တစ်သိန်းနှင့် တစ်ဒေါ်လာလျှင့် ၁၀၀ ကျပ်ကျော် ဈေးတက်လာခြင်းဖြစ်သည်။
Public Service Announcement
ယနေ့ ရွှေဈေးနှင့် ဒေါ်လာဈေးမှာ သမိုင်းတစ်လျှောက်အမြင့်ဆုံးနှုန်းထားဖြစ်ပြီး ယမန့်နှစ် စက်တင်ဘာလ ၂၇ ရက်ကအမြင့်ဆုံးဈေးများဖြစ်သော အခေါက်ရွှေတစ်ကျပ်သားလျှင် ကျပ် ၂၂ သိန်းကျော် (၂,၂၂၀,၀၀၀ )နှင့် တစ်ဒေါ်လာကို ၂၈၀၀ကျပ်ထက် ပိုများပြီး စံချိန်ချိုးခဲ့ခြင်းဖြစ်သည်။
စစ်အုပ်စုအာဏာမသိမ်းခင်က အခေါက်ရွှေတစ်ကျပ်သားကို ၁,၃၂၀,၀၀၀ကျပ် နှင့် တစ်ဒေါ်လာကို အမြင့်ဆုံး ၁၃၃၇ကျပ်သာ ရှိခဲ့သည်။ စစ်တပ်အာဏာသိမ်းပြီး တနှစ်ခွဲအကြာတွင် ကျပ်ငွေတန်ဖိုးသည် ငွေလဲတန်ဖိုးအရ ၁၁၃ ရာခိုင်နှုန်း တန်ဖိုးလျော့ကျသွားပြီး၊ ရွှေဈေးမှာလည်း နှစ်ဆမြင့်တက်သွားခြင်းဖြစ်သည်။
