စစ်ကောင်စီ၏ အကြမ်းဖက်တိုက်ခိုက်မှုများအပေါ် ကမ္ဘာ့ကျန်းမာရေးအဖွဲ့ (WHO)က နှုတ်ဆိတ်မနေရန် နှင့် ကျန်းမာရေးလုပ်သားများကို အကာအကွယ်ပေးရန် အကြိမ်ကြိမ်တောင်းဆိုထားကြောင်း NUG ကျန်းမာရေးဝန်ကြီးဌာနက ယနေ့ထုတ်ပြန်သည်။
နိုင်ငံတကာအသိုင်းအဝန်းအနေဖြင့် စစ်ကောင်စီ၏ အကြမ်းဖက်လုပ်ရပ်များကို ဖြစ်နိုင်သည့် နည်းလမ်းမှန်သမျှအသုံးပြု၍ အချိန်မီထိရောက်စွာ တားဆီးအရေးယူဆောင်ရွက်ရန်လည်း အမျိုးသားညီညွတ်ရေးအစိုးရ NUG ကျန်းမာရေးဝန်ကြီးဌာနက တိုက်တွန်းသည်။
မြန်မာနိုင်ငံတွင် စစ်အာဏာသိမ်းပြီးနောက် ၂၀၂၁ ခန့်မှန်းခြေ ကာကွယ်ဆေးထိုး လွှမ်းခြုံမှု (Estimated Immunization Coverage) မှာ BCG 48%, DPT3 37%, MR1 44% ရှိကြောင်း သိရှိရသည်ဟု ထုတ်ပြန်သည်။
ထို့ကြောင့် တစ်နှစ်အတွင်း အသက်တစ်နှစ်အောက် ကလေးဦးရေ ၉သိန်းခွဲ၏ တစ်ဝက်ကျော်သည် ပုံမှန်ကာကွယ်ဆေးများ အပြည့်အဝထိုးနှံနိုင်ခြင်း မရှိကြောင်း တွေ့ရှိရသည်ဟု ဆိုသည်။
Public Service Announcement
တိုင်းရင်းသားဒေသများအပါအဝင် မြန်မာနိုင်ငံအနှံ့အပြား၌ အသက် (၅) နှစ် အောက် ကလေးငယ်များသည် ပုံမှန်ရရှိသင့်သည့် ကာကွယ်ဆေးများ မရရှိကြဘဲ ကာကွယ် ဆေးဖြင့် ကာကွယ်နိုင်မည့် ရောဂါများ (Vaccine Preventable Diseases) ဖြစ်ပွားနိုင်သည့် အန္တရာယ်များနှင့် ရင်ဆိုင်နေရသည်ဟု ထုတ်ပြန်သည်။
NUG ကျန်းမာရေးဝန်ကြီးဌာနသည် COVID-19 ကာကွယ်ဆေးများ၊ ကလေးငယ်များအတွက် ပုံမှန်ရရှိသင့်သည့် ကာကွယ်ဆေးများအပါအဝင် ကျန်းမာရေးနှင့် လူသားချင်းစာနာထောက်ထားမှုဆိုင်ရာ အကူအညီ အထောက်အပံ့များ ရရှိရေးအတွက် ကုလ သမဂ္ဂအဖွဲ့အစည်းများ၊ အစိုးရမဟုတ်သော နိုင်ငံတကာအဖွဲ့အစည်းများနှင့် စဉ်ဆက်မပြတ် တွေ့ဆုံဆွေးနွေးနေကြောင်း အသိပေးသည်။
