စစ်ကိုင်းတိုင်း ကန့်ဘလူမြို့နယ် ဇီးကုန်းမြို့မှ နာမည်ကြီး ပျူစောထီးခေါင်းဆောင် ညိုဝင်းနိုင် ယနေ့နံနက်တွင် သေနတ်ဖြင့် ပစ်ခတ်ခံလိုက်ရသည်။
ညိုဝင်းနိုင်ကို ယနေ့(သြဂုတ်လ၁၇ရက်)နံနက် ၅ နာရီခွဲဝန်းကျင်က လက်ဖက်ရည်ဆိုင်၌ ထိုင်နေစဥ် အမျိုးသားအချို့က သေနတ်ဖြင့်ဝင်ရောက်ပစ်ခတ်ခဲ့ခြင်းဟု ကန့်ဘလူအခြေစိုက် တော်လှန်ရေးအင်အားစုများက သတင်းထုတ်ပြန်သည်။
ညိုဝင်းနိုင်သည် သူ့ကိုယ်သူ ပျူစောထီးအနေဖြင့် မကြာခဏ ဟစ်ကြွေး တတ်ပြီး စကားအပို ပြောတတ်သူဖြစ်၍ ငရွှီးဟုလည်း ဒေသခံများက ခေါ်ဝေါ်ကြသည်။
၎င်းနှင့်အတူ လက်ဖက်ရည်ဆိုင်ထိုင်နေသည့် ဗောဓိလှမြင့်ဆိုသူလည်း လက်မောင်းအား သေနတ် ကျည်ထိမှန်သွားသည်ဟု ကန့်ဘလူအခြေစိုက် ပြည်သူ့တော်လှန်ရေးသတင်းများ ဖော်ပြပေးနေ သော Infinity Group က အသိပေးထားသည်။
Public Service Announcement
“ပေါင်ထိသွားတယ်လို့လည်း ကြားတယ်။ဆီးခုံမှန်သွားတယ်လို့ လည်းကြား တယ်။ ဘယ်ထိထိ ဒီလောက်ညစ်ပတ်တဲ့ကောင် အခုလိုခံရတာ ကျေနပ်တယ်။ “ဟု ဒေသခံတစ်ဦးက Infinity Groupသို့ပြောကြောင်းလည်း ဖော်ပြထားသည်။
ညိုဝင်းနိုင်သေနတ်ဖြင့်အပစ်ခံရကြောင်း မျက်မြင်တွေ့သူတစ်ဦးက People’s Spring သို့ အတည်ပြုသည်။ ကန့်ဘလူဆေးရုံသို့ ခေါ်ဆောင်သွားပြီး နောက်ဆက်တွဲကို မသိရသေးဟု ၎င်းက ပြောသည်။
ညိုဝင်းနိုင်(ခ)ငရွှီးမှာ မြို့ခံလူထုအား နေ့စဥ်နဲ့အမျှခြိမ်းခြောက်ခြင်း၊ မြို့အတွင်းရှိ ပြည်သူများအား အကြောင်းမဲ့ဖမ်းဆီးကာ ငွေညစ်ခြင်း၊လမ်းသွားလမ်းလာ ကား၊ဆိုင်ကယ်များအားဖမ်းဆီးကာ ငွေညစ်ခြင်းအပြင် အချို့ ကားနှင့်ဆိုင်များပါ သိမ်းယူထားခြင်းတို့ကို အကြမ်းဖက်လုပ်ဆောင်နေသူဖြစ်သည်ဟု ဒေသခံအချို့က ပြောသည်။
