အကြမ်းဖက်စစ်ကောင်စီတပ်က မီးရှို့ခဲ့၍ အိမ်ခြေ ၅၀၀ ကျော်ပျက်စီးခဲ့သည့် ရေစကြိုမြို့နယ် ငတရော်ရွာ မှ ဒေသခံပြည်သူလူထုများ အရေးပေါ် အကူအညီများ လိုအပ်နေ၍ ထောက်ပံ့ကူညီပေးကြရန် ရေစကြိုမြို့နယ် ပြည်သူ့ကာကွယ်ရေးတပ်(PDF) တာဝန်ရှိသူတစ်ဦးဖြစ်သည့် ရဲဘော်ဝေကြီးက ပြည်သူလူထုများထံ တောင်းဆိုသည်။
“ကျွန်တော်တို့ကို ဝိုင်းဝန်းပြီး ကူညီကြပါအုံး။ ပြည်သူလူထုတွေ ဒုက္ခရောက်နေတဲ့ ဒုက္ခအပူတွေကိုကူထမ်းပေးကြပါအုံး အကူအညီတောင်းခံချင်ပါတယ်”ဟု ၎င်းက ဆိုသည်။
စစ်ကောင်စီနှင့် ပျူစောထီးများသည် ဩဂုတ် ၁၇ရက်မှစ၍ ငတရော်ရွာကို ဝင်ရောက်တပ်စွဲပြီး အိမ်ခြေ ၆၀၀ ကျော်ရှိသည့် ရွာကို ရွာလုံးကျွတ်နီးပါး မီးရှို့ခဲ့ခြင်းဖြစ်သည်။
“ငတရောရွာကို တညအိပ် ၂ရက် စစ်ကောင်စီက ဝင်ရောက်တပ်စွဲပြီး အိမ်ခြေ ၆၀၀ လောက်ရှိတဲ့ရွာကို ရွာလုံးကျွတ်နီးပါး ရှို့သွားတာ။ အိမ်ခြေ ၅၀၀ ကျော်ပါသွားတယ်။ ဘာမှကို မကျန်တော့ဘူး။ နွားတွေရော မြင်းတွေရော အကုန်ပါသွားတာ။ အိမ်ခြေ ၅၀၀ ကျော်က ပြည်သူတွေက နေစရာမရှိတော့ စစ်ရှောင်စခန်းမှာ နေနေရတယ်” ဟု ရဲဘော်ဝေကြီးက ပြောသည်။
Public Service Announcement
အဆိုပါ စစ်ရှောင်များ လတ်တလော စားနပ်ရိက္ခာအတွက် ရေစကြိုမြို့နယ် ပြည်သူ့ကာကွယ်ရေးအဖွဲ့(ပကဖ)က စီစဉ်ပေးထားသည်ဟုဆိုသည်။
စစ်ကောင်စီတပ်သည် ငတရော်ရွာကို မလာမီ လှေခုပ်ရွာမှ အိမ်ခြေ ၁၀၀ ကျော်ကို မီးရှို့ခဲ့သေးကြောင်း ရဲဘော်ဝေကြီးက ပြောသည်။
“အကြမ်းဖက် စစ်တပ်ကတော့ မနိုင်နိုင်ရာ မဲမှာပဲ။ ပြည်သူလူထုကို ဒုက္ခ အမျိုးမျိုးပေးမှာ။ တော်လှန်ရေးကို အားလျော့သွားအောင် ပြည်သူလူထုကို နောက်တွန့်သွားအောင် ဒုက္ခပေးမှာပဲ။ အဲဒီတော့ တော်လှန်ရေးအင်အားစုတွေနဲ့ အမျိုးသားညီညွတ်ရေးအစိုးရနဲ့ လက်တွဲညီညီ ပြည်သူနဲ့ ပူးပေါင်းပြီး တော်လှန်ရေး အောင်တဲ့အထိ ကြံ့ကြံ့ခံရင်ဆိုင်ကြဖို့ပေါ့” ဟု ၎င်းက ဆိုသည်။
စစ်ကောင်စီတပ်များ ယနေ့တွင်လည်း ရေစကြိုမြို့နယ်အတွင်း စစ်ကြောင်းထိုး လှုပ်ရှားမှုများ ဆက်ရှိနေပြီး ယနေ့တွင် တိုက်ပွဲဖြစ်ပွားမှုမရှိသေးပေ။
