မန္တလေးတိုင်း မတ္တရာမြို့နယ် ဇီးဖြူပင်ကြိုးတံတားအနီး ခြေကျင်တက်လာသည့်စစ်ကြောင်းကို မဟာမိတ်ညီ နောင်နှစ်ဖွဲ့ပူးပေါင်းပြီး မိုင်းဆွဲတိုက် ခိုက်ခဲ့ရာ စစ်ကောင်စီတပ်သား သုံးဦးသေဆုံးသွားကြောင်း နတ်ဆိုးပြောက်ကျားတပ်ဖွဲ့က ယနေ့(သြဂုတ် ၂၂) ထုတ်ပြန်သည်။
ယမန်နေ့ (သြဂုတ် ၂၁ ရက်) နေ့လယ် ၂ နာရီ ၁၀ မိနစ်ခန့်က ဇီးဖြူပင်ကြိုးတံတားအနီးသို့ အင်အား (၂၇)ဦးခန့်ဖြင့် ခြေကျင်တက်လာသော စစ်ကောင်စီတပ်စစ်ကြောင်းကို တိုက်သိမ်းအဖွဲ့နှင့် နတ်ဆိုးပြောက်ကျားတပ်တို့ပူးပေါင်းပြီး မိုင်းဆွဲတိုက်ခိုက်ခဲ့ခြင်းဖြစ်ကြောင်း ဖော်ပြသည်။
“နတ်ဆိုးနှင့်တိုက်သိမ်း မြေအောက်တော်လှန်ရေးတပ်ဖွဲ့ ၂ ဖွဲ့တို့ပူးပေါင်း မိုင်းဆွဲတိုက်ခိုက်ခဲ့ရာ စခသုံးကောင် ငရဲရောက်၍ အများအပြားထိခိုက် ဒဏ်ရာ အပြင်းထန်ရကာ မေကြီးရေဟုအော်၍ ပြေးသွားပြီး စစ်ကူခေါ်ကာ အလောင်းများလာကောက်၍ နေရာတွင်မြုပ်သွားပါသည်”ဟု ထုတ်ပြန်ချက်က ဆိုသည်။
အထက်ပါ စစ်ကောင်စီတပ်စစ်ကြောင်းသည် မတ္တရာနယ်အတွင်း နယ်မြေရှင်းလင်းရေးလုပ် ဆောင်ရန် လာရောက်ခြင်းဖြစ်သော်လည်း ၎င်းတို့တပ်များသာ မကြာခဏတိုက်ခိုက်ခံရပြီး သေဆုံးဒဏ်ရာရ၍သာ တပ်ပြန်ဆုတ်သွားရကြောင်း နတ်ဆိုးပြောက်ကျားတပ်က ပြောသည်။
Public Service Announcement
ပြီးခဲ့သည့် သြဂုတ် ၁၇ ရက်ကလည်း မတ္တရာနယ် ညောင်ငုတ်တိုနှင့် ကျောက်ဆည်လေးကျေးရွာကြားတွင် ယာဉ်အစီးရေ ရှစ်စီးပါ စစ်ယာဥ်တန်းအား နတ်ဆိုးအဖွဲ့နှင့် မဟာမိတ်တပ်များက မိုင်းဆွဲတိုက်ခိုက်ခဲ့ရာ စစ်ကားတစ်စီး ပျက်စီးကာ စစ်ကောင်စီတပ်သား (၁၂)ဦးထက်မနည်းသေဆုံးခဲ့သည်။
