မူး(မုန်း)မြို့နယ်အတွင်းရှိ ကနစိုးပင်ကျေးရွာကို စစ်တပ်ကဒီကနေ့မနက်ပိုင်းမှာ လေကြောင်းတိုက်ခိုက်ခဲ့လို့ သူရွာသားတွေ ထွက်ပြေးတိမ်းရှောင်နေရတယ်လို့ ကေအဲန်ယူက သတင်းထုတ်ပြန်ထားပါတယ်။
ဒီကနေ့ ဩဂုတ်လ(၂၃)ရက် မနက်(၅)နာရီ မိနစ်(၂၀)အချိန်က ကေအဲန်ယူ-ကရင်အမျိုးသားအစည်းအရုံး ခလယ်လွီထူခရိုင် မူးမြို့နယ်အတွင်းက ကနစိုးပင်ကျေးရွာအနီးမှာ ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ ၃ လက်အောက်ခံ တပ်ရင်း(၈)နဲ့ စစ်ကောင်စီတပ်တို့အကြား မိနစ်(၄၀) ကြာ တိုက်ပွဲဖြစ်ပွားခဲ့တာပါ။
အဲ့ဒီနောက် မနက်(၇)နာရီ မိနစ်(၂၀)အချိန်မှာ စစ်ကောင်စီတပ်က ကနစိုးပင်ကျေးရွာအတွင်းကို ရဟတ်ယာဉ်နဲ့ လာရောက်ပစ်ခတ်တာတွေပြုလုပ်ခဲ့ပြီး ဒီလိုရဟတ်ယာဉ်နဲ့ပစ်ခတ်တာတွေ ပြုလုပ်ခဲ့တာကြောင့် ဒေသခံပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ထုတ်ပြန်ချက်မှာဖော်ပြထားပါတယ်။
စစ်ကောင်စီတပ်က ရဟတ်ယာဉ်နဲ့ လာရောက်ပစ်ခတ်ခဲ့တဲ့ ကနစိုးပင်ကျေးရွာဟာ ကေအဲန်ယူ-မူးမြို့နယ်စီမံအုပ်ချုပ်နယ်မြေဖြစ်ပြီး တိုက်ပွဲတွေမကြာခဏဆိုသလို ဖြစ်ပွားလျက်ရှိတဲ့ နေရာတစ်ခုလည်းဖြစ်တယ်လို့ ကေအဲန်ယူက ဆိုပါတယ်။
Public Service Announcement
ကနစိုးပင်ကျေးရွာအတွင်းမှာ အိမ်ခြေပေါင်း(၂၂၀)ခန့်နဲ့ လူဦးရေ(၁၁၁၇)ဦးခန့် နေထိုင်ပြီး လက်ရှိအချိန်မှတော့ ကျေးရွာအတွင်းရှိ ဒေသခံပြည်သူလူထုတွေဟာ အသက်ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ထုတ်ပြန်ချက်မှာပါရှိပါတယ်။
ကေအဲန်ယူ-ခလယ်လွီထူ(ညောင်လေးပင်)ခရိုင် တပ်မဟာ ၃ နယ်မြေအတွင်းမှာ စစ်ကောင်စီတပ်ရဲ့ ထိုးစစ်ဆင်မှုတွေကြောင့် ခရိုင်အတွင်းက ဒေသခံပြည်သူဦးရေ(၆၁၀၀၀)ကျော်ဟာ ဘေးလွတ်ရာကိုထွက်ပြေးတိမ်းရှောင်ခဲ့ရပြီး အခက်အခဲတွေရင်ဆိုင်ကြုံတွေ့နေရတယ်လို့ ကေအဲန်ယူက သတင်းထုတ်ပြန်ထားတာဖြစ်ပါတယ်။
