ပုလောမြို့နယ် ပုလောကုန်းကျေးရွာအနီးတပ်စွဲထားသော စစ်ကောင်စီတပ်ကို ပစ်ခတ်တိုက်ခိုက်ခဲ့ရာ စစ်ကောင်စီတပ်သား နှစ်ဦးသေဆုံးသွားကြောင်း ပုလောမြို့နယ် ပြည်သူ့ကာကွယ် ရေးတပ်မတော်၊ မြိုတ်ခရိုင် တပ်ရင်း (၁)မှ ယနေ့(သြဂုတ် ၂၄) ထုတ်ပြန်သည်။
“ကျွန်တော်တို့ ဘက်ကနေ သွားရောက် ပစ်ခတ်တာပါ။ သူတို့က ပုံမှန်တပ်စွဲထားတဲ့အတိုင်းရှိနေတုန်းသွားရောက်ပစ်ခတ်တာပါ။အာဏာသိမ်းကတည်းက တပ်စွဲထားတဲ့ ရွာပါ”ဟု မြိတ်ခရိုင်တပ်ရင်း (၁) မှတာဝန်ရှိက People’s Spring သို့ ပြောသည်။
ပုလောကုန်းကျေးရွာအနီးတပ်စွဲထားသော စစ်ကောင်စီတပ်ကို ယနေ့နံနက် ၈ နာရီခန့်က ပုလောမြို့နယ်ပြည်သူ့ကာကွယ်ရေးတပ်မတော် ၊မြိတ်ခရိုင်တပ်ရင်း(၁)နှင့် မဟာမိတ်တပ်ဖွဲ့များပူးပေါင်း၍ လက်နက်ငယ်များဖြင့် ဝင်ရောက်ပစ်ခတ်ခဲ့ခြင်းဖြစ်ကြောင်းလည်း ပုလောPDFကအသိပေးထားသည်။
နှစ်ဖက်အပြန်အလှန်ပစ်ခတ်ကာ မိနစ် ၃၀ခန့် ကြာတိုက်ပွဲဖြစ်ပွားခဲ့သည်။ စစ်ကောင်စီဘက်မှ လက်နက်ကြီးများဖြင့် ရမ်းသမ်းပစ်ခတ်လျက်ရှိသည်ကြောင်းလည်း သိရသည်။
ထို့အပြင် ယနေ့နံနက် ၉ နာရီ ၃၀ ခန့်တွင် ထားဝယ်မြို့မှ ပုလောမြို့သို့ ဆင်းလာသော စစ်ကောင်စီ ယာဉ်တန်းကို ပုလောမြို့၊ မိုင်တိုင်အမှတ် (၄)အနီး၌ ပြည်သူ့ကာကွယ်ရေးတပ်များက မိုင်းနှစ်လုံးဖြင့် ဖောက်ခွဲတိုက်ခိုက်ခဲ့ပြီး ထိခိုက်သေးဆုံးမှုကိုမူ မသိရသေးကြောင်း ဖော်ပြသည်။
အထက်ပါတိုက်ခိုက်မှုဖြစ်စဥ်များတွင် ပုလောမြို့နယ်ပြည်သူ့ကာကွယ်ရေးတပ်မတော်၊ မြိုင်ခရိုင်တပ်ရင်း (၁)မှ ရဲဘော်များ ထိခိုက်မှုမရှိဘဲ အောင်မြင်စွာဆုတ်ခွာနိုင်ခဲ့ကြောင်း ထုတ်ပြန်ထားသည်။