စစ်ကောင်စီတပ်သား ၂ဦးသေဆုံးပြီး အများအပြားထိခိုက်ဒဏ်ရာရ
စစ်ကောင်စီတပ်သား ၂ဦးသေဆုံးပြီး အများအပြားထိခိုက်ဒဏ်ရာရစစ်ကိုင်းတိုင်း၊ မြောင်မြို့နယ်တွင် စစ်ကောင်စီတပ်ကို တစ်ဦးတည်းခုခံပစ်ခတ်ရင်း ( စစ်ကောင်စီတပ်ကြပ်ဟောင်း) ပြည်သူ့ရဲဘော်တစ်ဦး ကျဆုံးခဲ့ကြောင်း မြောင်CDSOM အဖွဲ့က သတင်းထုတ်ပြန်သည်။
ယမန်နေ့ (စက်တင်ဘာလ ၂ ရက်) က စစ်ကောင် စီတပ်သည် မြောင်မြို့နယ်အတွင်းရှိ မြစ်သာရွာနှင့် ကင်းကျေးရွာတို့တွင် စစ်ကြောင်း နှစ်ကြောင်း တပြိုင်ထည်းဝင်ရောက်ခဲ့သည်။
မြစ်သာရွာဘက် ရောက်ရှိနေသော စစ်ကြောင်းနှင့် မြောင်မြို့နယ်ပြည်သူ့ကာကွယ်ရေးနှင့် လုံခြုံရေးအဖွဲ့ (CDSOM)မှ ကင်းထောက်ရဲဘော် နှစ်ဦးနှင့် ထိတွေ့မှုဖြစ်ပွားခဲ့သည်။
အသင့်စောင့်နှင့်နေသော စစ်ကောင်စီကင်းပုန်းများနှင့် ကာကွယ်ရေးရဲဘော် နှစ်ဦးတို့ နှစ်ဖက်အပြန်အလှန်ပစ်ခတ်ခဲ့ကြပြီး ကင်းထောက်ရဲဘော် နှစ်ဦးအနက် တစ်ဦးမှာ လက်မောင်းဒဏ် ရာရရှိခဲ့သည်။
Public Service Announcement
ဒဏ်ရာရရဲဘော်အား ပြန်ဆုတ်ခိုင်းပြီး ကျန်ရဲဘော်မှ ခံပစ်ကူရင်း ကျည်ဘောက်(၃)ခုကုန်သည့်တိုင်အောင် အကြမ်းဖက်စစ်ကောင်စီတပ်များကို ခုခံပစ်ခတ်ခဲ့သည်ဟု CDSOM က ပြော သည်။
မွန်းလွဲ ၁၂နာရီ ၄၀ မိနစ်တွင် ခုခံပစ်ခတ်ပေးနေသည့် CDSOM အနောက်ပိုင်းတိုက်ခိုက်ရေးနှင့် ကာကွယ်ရေးအဖွဲ့ (006) အဖွဲ့က ရဲဘော် သန့်ဇင်သည် စစ်ကောင်စီဘက်က လက်နက်ကြီး၊ လက်နက်ငယ်များဖြင့် ပစ်ခတ်မှုကြောင့် ကျည်ပေါက်ရာဗလပွ ၊ မျက်နှာတခြမ်းပျက်ဆီးပြီး ၊ အသားများကြေမွ ပွင့်ထွက်ပြီး ပြည်သူများနှင့်သွေးသောက်ရဲဘော်အား ခုခံကာကွယ်ရင်း မြင့်မြတ်စွာကျဆုံးသွားခဲ့ကြောင်း CDSOM အဖွဲ့က ပြောသည်။
အဆိုပါတိုက်ပွဲတွင် အာဇာနည် ရဲဘော် ကိုသန့်ဇင်၏ ပစ်ခတ်မှုကြောင့် စစ်ကောင်စီတပ်သား နှစ်ဦးသေဆုံးပြီး ထိခိုက်ဒဏ်ရာရသူ အများအပြားရှိခဲ့ကြောင်း CDSOM အဖွဲ့က ပြောသည်။
ကျဆုံးသွားသည့် အာဇာနည် ကိုသန့်ဇင်သည် ယခင်က (၂၅၆)တပ်ရင်းမှ တပ်ကြပ်ရာထူးရှိသူဖြစ်ပြီး တပ်တွင်းနေထိုင်မှု စားသောက်မှု ခက်ခဲသောကြောင့် ထွက်ပြေးခဲ့သည့်အတွက် သက်ဆိုင်ရာ ပြစ်ဒဏ်ခံခဲ့ရသူတစ်ဦးဖြစ်ကြောင်း CDSOMက အသိပေးသည်။
၎င်းသည် ကိုဗစ်ကာလ နိုင်ငံတော်လွတ်ငြိမ်းချမ်းသာခွင့်နှင့် ပြန်လည်လွတ်မြောက်လာပြီး ၂၀၂၁ နွေဦးတော်လှန်ရေးတွင် ပြည်သူ့ကာကွယ်ရေးတပ်သားအဖြစ် တာဝန်ထမ်းဆောင်ခဲ့သူတစ်ယောက်ဖြစ်ကြောင်း သိရသည်။
“သူသည်တာဝန်ကျေလွန်းသည်ထက်များစွာထမ်းဆောင်သူတစ်ယောက်ဖြစ်ပါသည် ။
ရဲဘော်ရေ နွေဦးတော်လှန်ရေးမှာ မြောင်မြို့နယ် အတွက် တာဝန်ကျေခဲ့ပါပြီ။ ကျန်ရစ်ခဲ့တဲ့ ခင်များရဲ့ရဲဘော်တွေကိုလည်း ကျနော်တို့တစ်တွေ ပြုစုစောင့်ရှောက်ပေးသွားပါမယ်။
စိတ်ဖြောင့်ဖြောင့်နဲ့သာ သွားပါတော့။ ကြယ်တွေကြွေတာ ရပ်ပါတော့။ကောင်းမွန်မြင့်မြတ်ရာ ဘုံဘဝမှာ ငြိမ်းချမ်းစွာ အနားယူပါတော့။”ဟု CDSOM အဖွဲ့ဝင် ကိုနွေဦး-မြောင် က ပြောသည်။
မြောင်မြို့နယ်တွင် သြဂုတ်လကုန်ပိုင်းမှ စတင်ကာ စစ်ကောင်စီတပ်များ တကျော့ပြန်စစ်ကြောင်းထိုးနေပြီး ဒေသခံပြည်သူ သုံးဦးထက် မနည်း သတ်ဖြတ်ခံထားရသည်။
