စစ်ကိုင်းတိုင်း၊ မုံရွာ – မန္တလေးလမ်းတွင် စစ်ကောင်စီပိုင်ယာဥ်လိုင်းများကိုပါ တိုက်ခိုက်မည်ဖြစ်၍ ပြည်သူများအနေဖြင့် အဆိုပါယာဥ်လိုင်းများအား လိုက်ပါစီးနင်းခြင်းမပြုရန် စစ်ကိုင်းမြို့နယ်ပြည်သူ့ကာကွယ်ရေးအဖွဲ့က သတိပေးသည်။
မန္တလေး – မုံရွာခရီးစဥ်တွင် ခရီးသွားပြည်သူများအနေဖြင့် စစ်ကောင်စီ၏ စီးပွားရေး ဦးပိုင်လိမီတက်ပိုင် ရွှေမန်းသူယာဥ်လိုင်း၊ ရှမ်းမလေးယာဥ်လိုင်းများဖြင့် လိုက်ပါစီးနင်းခြင်းမပြုရန် မေတ္တာရပ်ခံသတိပေးကြောင်း စစ်ကိုင်းမြို့နယ် ပြည်သူ့ကာကွယ်ရေးအဖွဲ့က ယမန်နေ့ (စက်တင်ဘာ ၈ ရက်) ထုတ်ပြန်သည်။
၎င်းကားများ ခရီးစဥ်လမ်းကြောပေါ်သို့ ရောက်ရှိလာပါက မဟာမိတ်တပ်ဖွဲ့များက မိုင်းဆွဲတိုက်ခိုက်သွားမည်ဖြစ်ကြောင်း PDF စစ်ကိုင်းက သတိပေးသည်။
အဆိုပါ ယာဥ်များဖြင့် မန္တလေး – မုံရွာခရီးစဥ်အား လိုက်ပါစီးနင်းလာပါက တာဝန်ယူမည်မဟုတ်ကြောင်း၊ စီးနင်းသူ၏ တာဝန်သာဖြစ်ပြီး တော်လှန်ရေးအင်အားစုများက ထိရောက်စွာ အရေးယူဆောင်ရွက်သွားမည်ဖြစ်ကြောင်း စစ်ကိုင်းမြို့နယ်ပြည်သူ့ကာကွယ်ရေးအဖွဲ့၏ ထုတ်ပြန်ချက်တွင် ဖော်ပြထားသည်။
မုံရွာ – မန္တလေးလမ်းမကြီးပေါ်တွင် စစ်ကောင်စီယာဥ်များအား လမ်းတစ် လျှောက်ရှိ ဒေသတွင်း ပြည်သူ့ကာကွယ်ရေးအဖွဲ့များက မကြာခဏ မိုင်းဆွဲတိုက်ခိုက်လေ့ရှိသည်။