တော်လှန်လူငယ်များအတွက် အင်းလျားကို ပြန်သိမ်းမည့် Spring Inya စီမံကိန်းကို အကောင်အထည်ဖော်မည်ဟု NUG၏ ရှယ်ယာရောင်းချရေးအဖွဲ့ (EOD)က ယမန့်နေ့က ထုတ်ပြန်ကြေညာသည်။
လက်ရှိတွင် ကန်ပတ်လယ်ရှိ နေရာကောင်းမှန်သမျှကို စစ်ကောင်စီက မတရားသိမ်းပိုက်ထားပြီး စစ်မျိုးစစ်နွယ်များ၏ စီးပွားရေး ပရောဂျက်များ ပြည့်နှက်နေခြင်းကြောင့် ယခုကဲသို့ ပြန်လည်သိမ်းပိုက်မည့် အစီအစဉ်ကို စတင်ရခြင်းဖြစ်သည်ဟု NUGကထုတ်ပြန်သည်။
အင်ယားကန်ဘောင်၏အရှေ့ဖက်နှင့်အနောက်ဘက်နေရာများသာ အများပြည်သူအတွက် ကျန်ရှိတော့၍ တော်လှန်လူငယ်များအတွက် အင်းယားကို ပြန်သိမ်းခြင်းဖြစ်သည်ဟုလည်း အသိပေးသည်။
“ဒီစီမံကိန်းဟာဆိုရင်နွေဦးအောင်ပွဲခံလူငယ်တွေ၊ Generation Z မျိုးဆက်တွေရဲ့လွတ်လပ်ခြင်း၊ ရဲ့ရင့်ခြင်း၊ တက်ကြွခြင်း၊ လူသားတစ်ဦးရဲ့ ဖြစ်တည်မှုနဲ့ မူလကိုယ်ပိုင် တန်ဖိုးတွေ အလျင်မပြတ် စီးဆင်းနေစေဖို့၊ နွေဦးမှာ ဖူးသစ်ခဲ့ကြတဲ့ စွန့်လွှတ်အနစ်နာခံ စိတ်တွေ ရှင်သန်ကြီးထွားနေစေဖို့ လူငယ် ပြည်သူတွေကို ဂုဏ်ပြုပေးမယ့်စီမံကိန်းလည်းဖြစ်ပါတယ်။”ဟု NUG၏ရှယ်ယာရောင်းချရေးအဖွဲ့ကပြောသည်။
Public Service Announcement
စီမံကိန်းတွင်အင်းလျားကန်ပတ်လမ်းပါဝင်ပြီးလမ်းလျောက်ခြင်း၊ စက်ဘီးစီးခြင်း၊ ရှုခင်းကြည့်ရှုခြင်းတို့အတွက် ကျွန်းဆက်လမ်းများနှင့် အင်းလျားမျှော်စင်တို့ကိုထည့်သွင်းတည်ဆောက်သွားမည်ဟုလည်းဖော်ပြထားသည်။
ထိုအပြင်လူငယ်များ အနုပညာဖန်ဆီးရန်၊မျှဝေရန်နှင့် ခံစားရန် ပွဲကြည့်စဉ် တစ်ခုကိုလည်း တည်ဆောက်သွားမည်ဟုဆိုသည်။ အနုပညာပြခန်းများ၊ ပန်းချီပြခန်းများနှင့် စကိတ်ကွင်းများကိုလည်း တည်ဆောက်သွားမည်ဟုဆိုထားသည်။ ထိုပြင်နိုင်ငံရေးဆွေးနွေးငြင်းခုံရန်အတွက်လူထုစကားပြောစင်မြင့်တစ်ခုကိုလည်း အကောင်အထည်ဖော်သွားမည်ဟုလည်းအသိပေးသည်။
ယခုစီမံကိန်း NUG၏ ရှယ်ယာရောင်းချရေးအဖွဲ့က ထုတ်ပြန်သည့် တတိယမြောက်စီမံကိန်းဖြစ်ပြီး နွေဦးရိပ်မွန် စီမံကိန်းနှင့် နွေဦးမော်ကွန်းသစ်တို့၏ မြေကွက်၇၅၀ ကိုထုတ်ရောင်းခဲ့ရာမြေကွက် (၄၀ ) ဝန်းကျင်သာကျန်ရှိတော့ကြောင်းထုတ်ပြန်ထားသည်။
