ကရင်အမျိုးသားအစည်းအရုံး(KNU) တပ်မဟာ (၅) ဖာပွန်ခရိုင်တွင် စစ်ကောင်စီ လက်အောက်ခံ နယ်ခြားစောင့်တပ်ဖွဲ့(BGF)က ပိုကြည်ကျေးရွာ ပတ်လည်တွင်မိုင်းများ ထောင်ခဲ့သည့်အပြင် တစ်ရွာနှင့်တစ်ရွာ သွားလာခြင်းမပြုရန် ဒေသခံ ပြည်သူများအား အမိန့်ပေးညွှန်ကြားထားသည် ဟု တပ်မဟာ(၅)၏ မူတြော်သတင်းစဉ်က ဖော်ပြသည်။
စက်တင်ဘာ ၂၉ရက်တွင် BGF တပ်ရင်း တပ်ရင်းမှူး ဗိုလ်မောင်ချစ်က BGF တပ်နယ်အမှတ်(၃) ဒုတပ်ခွဲမှူး နှင့် အဖွဲ့အား ပိုကြည်ကျေးရွာသို့ စေလွှတ်ကာ ကျေးရွာပတ်လည်ကို မိုင်းထောင်ခိုင်းခြင်း၊ မဲကုလား၊ ပိုကြည်၊ လယ်ကွဲ၊ တခေါ်ခို့ရွာများအပြင် ဖာပွန် – ကမမောင်း ကားလမ်းမပေါ်၌ နေထိုင်သည့် ရွာသားများအား တစ်ရွာနှင့်တစ်ရွာ အကြား သွားလာခြင်း မပြုရန် ညွှန်ကြားခဲ့ခြင်းဖြစ်သည်ဟုဆိုသည်။
အလားတူ ယွန်းစလင်း မြစ်အရှေ့ဘက်ကမ်းရှိ ကျေးရွာများမှ ရွာသားများကိုလည်း စက်လှေ၊ ဆိုင်ကယ်နှင့် ကားများ ခရီးသွားလာခွင့်မပြုတော့ဘဲ တားဆီးပိတ်ပင်ထားသည်ကို စုံစမ်းသိရကြောင်း ဖော်ပြထားသည်။
ထို့ပြင် နို့ထစာသင်ကျောင်းသို့ ပညာသင်နေသည့် ကျေးရွာများမှ ကျောင်းသူကျောင်းသားများအား ထီးလာပလယ်ထ တံတားအား ဖြတ်ကျော်ခွင့်မပြုရန်၊ ကျောင်းသားကျောင်းသူများအား ပညာဆက်လက်သင်ယူရန် ခွင့်မပြုရန်တို့ကို စစ်ကောင်စီ ခါးပိုက်ဆောင်တပ် BGF က တားမြစ်ထားသည်ဟုလည်း တပ်မဟာ(၅)က သတင်းထုတ်ပြန်သည်။
Public Service Announcement
KNU တပ်မဟာ(၅)အနေဖြင့်လည်း ဖာပွန်ခရိုင်အတွင်းရှိ စစ်ကောင်စီတပ်နှင့် လက်ပါးစေ BGF တို့ကို ခြုံခိုတိုက်ခိုက်မှုများ နေ့စဉ်နီးပါး လုပ်ဆောင်လျက်ရှိရာ စစ်ကောင်စီနှင့် BGFတပ်မှ သေဆုံးထိခိုက်မှုများ ဆက်တိုက်ဖြစ်ပေါ်လျက်ရှိသည်။
