ပဲခူးတိုင်း နတ္တလင်းမြို့နယ် ကရင်ဆင်စွဲကျေးရွာသို့ စစ်ကြောင်းထိုးလာသည့် စစ်ကောင်စီတပ်ကို မိုင်းဆွဲတိုက်ခိုက်ခဲ့ကြောင်း သာယာဝတီခရိုင် PDF တပ်ရင်း (၃၈၀၁)၊ တပ်ခွဲ (၄)MRF-Nattlin က ပြောသည်။
ယမန်နေ့ (အောက်တိုဘာ ၈ ရက်)နံနက် ၁၀ နာရီခွဲက နတ္တလင်းမြို့နယ် ကရင်ဆင်စွဲရွာဘက်သို့ အင်အား ၂၃ဦးခန့်ဖြင့် စစ်ကြောင်းထိုးလာသည့် စစ်ကောင်စီတပ်ကို အဆိုပါရွာထိပ်အရောက်တွင် မိုင်းဆွဲတိုက်ခိုက်ခဲ့ခြင်းဖြစ်သည်ဟု ဆိုသည်။
အဆိုပါ မိုင်းဆွဲတိုက်ခိုက်မှုအတွင်း စစ်ကောင်စီတပ်မှ လေးဦးသေဆုံးပြီး ခုနစ်ဦးထက်မနည်း ဒဏ်ရာပြင်းထန်စွာရရှိသွားပြီး တော်လှန်ရေးရဲဘော်များ အထိအခိုက်မရှိခဲ့ကြောင်း MRF-Nattlin က ပြောသည်။
“ သူတို့က ပဲခူးရိုးမအစပ်က တောင်ညိုဆည်မှာ အထိုင်ထားပြီး အဲဒီကနေ ရိုးမကရွာတွေကို အမြဲစစ်ကြောင်းထိုးနေတာပါ” ဟု MRF-Nattlin မှ တော်လှန်ရေးရဲဘော်တစ်ဦးက ပြောသည်။
Public Service Announcement
အကြမ်းဖက်စစ်ကောင်စီတပ်များသည် ကရင်ဆင်စွဲရွာအပါအဝင် တောင်ညိုဆည်အနီးဝန်းကျင်ရှိကျေးရွာများသို့ ဝင်ရောက်ကာ လမ်းပြလုပ်ခိုင်းခြင်း၊ ပျူစောထီးအဖွဲ့များ ဖွဲ့စည်းစေခြင်း စသည်တို့ကို ပြုလုပ်သည့်အပြင် ၎င်းတို့နှင့်မပူးပေါင်းပါက ကျေးရွာများကို မီးရှို့မည်ဟု ခြိမ်းခြောက်မှုများလုပ်ဆောင်နေသည်ဟု အထက်ပါရဲဘော်က ဆက်ပြောသည်။
သာယာဝတီခရိုင် PDF တပ်ရင်း (၃၈၀၁)၊ တပ်ခွဲ (၄) MRF-Nattlin အနေဖြင့် စစ်ကောင်စီတပ်နှင့် ၎င်း ၏ထောက်တိုင်များအား စဥ်ဆက်မပြတ် တိုက်ခိုက်ချေ မှုန်းသွားမည်ဖြစ်၍ ပြည်သူများ ၎င်းတို့နှင့် နီးကပ်စွာနေထိုင်ခြင်းမပြုကြရန် သတိပေးထားသည်။
