ဇီးကုန်း MEC သကြားစက်ရုံရှိ စစ်ကောင်စီတပ်ကို ဒရုန်းဖြင့် ဗုံးကြဲတိုက်ခိုက်

စစ်ကိုင်းတိုင်း၊ ကန့်ဘလူမြို့နယ်ရှိ ဇီးကုန်း MEC သကြားစက်ရုံ၌ အထိုင်ချတပ်စွဲထားသော စစ်ကောင်စီတပ်စခန်းအား ဒရုန်းဖြင့် ဗုံးကြဲတိုက်ခိုက်ခဲ့ပြီး နှစ်ဖက်အပြန်အလှန်ပစ်ခတ်မှုဖြစ်ပွားခဲ့ကြောင်း လင်းယုန်နီ ကန့်ဘလူအဖွဲ့၏ တာဝန်ခံက ပြောသည်။

ပြီးခဲ့သည့် အောက်တိုဘာ ၇ ရက်နံနက် ၉ နာရီခန့်က ဇီးကုန်း MEC သကြားစက်ရှိ ကင်းစောင့်စစ်ကောင်စီတပ်သားများကို နယ်မြေခံ ပြည်သူ့ကာကွယ်ရေးအဖွဲ့များပူးပေါင်း၍ ဒရုန်းဖြင့် စတင်တိုက်ခိုက်ခဲ့ကြောင်း လင်းယုန်နီကန့်ဘလူအဖွဲ့၏ တာဝန်ခံက ပြောသည်။

ဒရုန်းဖြင့် တိုက်ခိုက်ခံရပြီးနောက် စစ်ကောင်စီတပ်သားများ ထွက်လာရာ မိနစ်၂၀ခန့် အပြန်လှန်ပစ်ခက်ခဲ့​ကြကြောင်း၊ ဖြစ်စဥ်များအတွင်း စစ်ကောင်စီတပ်ဖွဲ့ဝင် နှစ်ဦးသေဆုံးကြောင်း လင်းယုန်နီကန့်ဘလူအဖွဲ့၏ တာဝန်ခံက ပြောသည်။

ဖြစ်စဥ်နှင့်ပတ်သက်၍ လင်းယုန်နီကန့်ဘလူအဖွဲ့၏ တာဝန်ခံက “မနက်စောကတည်းက ပြင်ဆင်ကြရပါတယ်။ ၉နာရီလောက်မှာ mission စတာပါ။ ဒရုန်းနဲ့ ကျဲချလိုက်တာက ထိခိုက်တာဗျ။ ပြီးမှ ထွက်လာပြီး ပစ်ကြတာ။ မစ်ရှင်သွားလုပ်တော့ သတင်းပေါက်သွားတယ်ဗျ။ ကျွန်တော်တို့သွားတဲ့လမ်းကြောင်းကို သေချာ ပြင်ဆင်ချိန်မရလိုက်တော့ အဖြစ်ပဲ လုပ်ခဲ့ရတယ်ဗျ။ ပြည်သူတွေအနေနဲ့ ကျွန်တော်တို့တော်လှန်ရေး အင်အားစုတွေ လှုပ်ရှားမှုကို တက်နိုင်သလောက် ထိန်းပေးဖို့ပါဗျ။”ဟု ပြောကြားသည်။

Public Service Announcement

အဆိုပါ စက်ရုံအတွင်းရှိ စစ်ကောင်စီတပ်သားများသည် ခရီးသွားပြည်သူများအပေါ် မှတ်ပုံတင်ကအစ ခရီးသွားထောက်ခံစာအဆုံး စစ်ဆေးပြီး အကြောင်းအမျိုးမျိုးပြကာ ခြိမ်းခြောက်ငွေတောင်းခံလေ့ရှိကြောင်း၊ စစ်ကောင်စီတပ်ဖွဲ့အပြင် ပျူစောထီးများလည်း လာရောက်စတည်းချလေ့ရှိကြောင်း ဒေသခံများက ပြောသည်။

တိုက်ခိုက်မှုအတွင်း ပြည်သူ့ရဲဘော်များ အထိအခိုက်မရှိ ​ဆုတ်ခွာနိုင်ခဲ့ပြီး စစ်ဆင်ရေးအား Kanbalu Underground Warriors ၊ MPF U-18 ၊ PLGF ၊ လင်းယုန်နီ ကန့်ဘလူအဖွဲ့များ ပူးပေါင်း၍ ဆောင်ရွက်ခဲ့ခြင်းဖြစ်ကြောင်း အသိပေးထားသည်။

ဇီးကုန်း MEC သကြားစက်ရုံရှိ စစ်ကောင်စီတပ်များအား ပြီးခဲ့သည့် စက်တင်ဘာ ၆ ရက်ကလည်း တစ်ကြိမ်တိုက်ခိုက်ခံခဲ့ရသေးသည်။