ပဲခူးတိုင်း နတ္တလင်းမြို့နယ် ကြက်မနက်ကျေးရွာမှ ညောင်လေးပင်ကျေးရွာဘက်သို့ စစ်ကြောင်းထိုးလာသည့် စစ်ကောင်စီတပ်ကို တစ်ရက်ထဲ သုံးကြိမ်မိုင်းဆွဲတိုက်ခိုက်ခဲ့ကြောင်း သာယာဝတီခရိုင် PDF တပ်ရင်း (၃၈၀၁)တပ်ခွဲ (၂)Phoenix DF က ပြောသည်။
ယမန်နေ့ (အောက်တိုဘာ ၁၃ ရက်)နံနက် ၁၀ နာရီခွဲခန့်က နတ္တလင်းမြို့နယ် ကြက်မနက်ကျေးရွာမှ ညောင်လေးပင်ဘက်သို့ စစ်ကြောင်းထိုးလာသည့် အင်အား (၅၀)ခန့်ပါ စစ်ကောင်စီတပ်ကို သာယာဝတီခရိုင် တပ်ရင်း (၃၈၀၁)၊ တပ်ခွဲ (၁)Zigon PDF နှင့် တပ်ခွဲ (၂)Phoneix DF တို့ပူးပေါင်းပြီး ပဒေသာမိုင်းဖြင့် နှစ်ကြိမ်တိုက်ခိုက်ခဲ့သည်ဟု ဆိုသည်။
အဆိုပါတိုက်ခိုက်မှုအတွင်း စစ်ကောင်စီတပ်မှ လေးဦးသေဆုံးကာ ခြောက်ဦးထိခိုက်ဒဏ်ရာရသွားကြောင်း Phoneix DF က ပြောသည်။
အလားတူ ယင်းနေ့နေ့လယ် ၁ နာရီကျော်ခန့်ကလည်း ထပ်မံစစ်ကြောင်းထိုးလာသည့် စစ်ကောင်စီတပ်အား PDF ပူးပေါင်းတပ်မှ ပဒေသာမိုင်းဖြင့် ထပ်မံမိုင်းဆွဲတိုက်ခိုက်ခဲ့ရာ စစ်ကောင်စီတပ်မှ ခြောက်ဦးသေဆုံးသွားသည်ဟု ဆိုသည်။
Public Service Announcement
“မိုင်းဆွဲတာ တော့သုံးကြိမ်ပေါ့နော်။ ပြည်သူတွေကိုတော့ ပေါ်တာဆွဲတာ အလောင်းနဲ့ ဒဏ်ရာရတွေကိုထမ်းခိုင်းတာရှိတယ်။ ဖမ်းတာ မဟုတ်ဘူး။ ပေါ်တာဆွဲတာ အလုပ်ခိုင်းတာပေါ့”ဟု သာယာဝတီခရိုင် PDF တပ်ခွဲ (၂)မှ တော်လှန်ရေးရဲဘော်တစ်ဦးက ပြောသည်။
အကြမ်းဖက်စစ်ကောင်စီတပ်များသည် နတ္တလင်းမြို့နယ်ရှိ တောင်ညိုဆည်အား အခြေပြုကာ အနီးဝန်းကျင်ကျေးရွာများအား စစ်ကြောင်းထိုးခြင်း၊ ပေါ်တာဆွဲခြင်းအပါအဝင် ပြည်သူလူထုအား ဖမ်းဆီးစစ်ဆေးခြင်းများလုပ်ဆောင်လျှက်ရှိသည်။
