ရှမ်းပြည်နယ်မြောက်ပိုင်း နမ့်ဆန်မြို့နယ်၌ စစ်ကောင်စီတပ်က ယမန်နေ့ညပိုင်းတွင် လေကြောင်းမှ ဗုံးကြဲတိုက်ခိုက်မှု ငါးကြိမ်ပြုလုပ်ခဲ့သည်ဟု TNLAက သတင်းထုတ်ပြန်သည်။
ဒီဇင်ဘာ ၇ရက်က စတင်ခဲ့သည့် တိုက်ပွဲဖြစ်ပွားမှု နှင့်ပတ်သက်ပြီး ယနေ့(ဒီဇင်ဘာ ၁၂ရက်)နံနက်ပိုင်းအထိ စစ်ရေးအခြေအနေကို TNLAက ထုတ်ပြန်ခဲ့ခြင်းဖြစ်သည်။
ယမန်နေ့ညပိုင်းတွင် စစ်ကောင်စီတပ်က အလေးချိန်ပေါင် ၅၀၀ရှိ ဗုံးများ အသုံးပြုပြီးတိုက်ပွဲဖြစ်ပွားရာ အနီးသို့ နှစ်ကြိမ်၊ နမ့်ဆန်မြို့နယ် ရေပုံးကျေးရွာအနီး သုံးကြိမ် စုစုပေါင်းငါးကြိမ် ဗုံးကြဲတိုက်ခိုက်ခဲ့ကြောင်း ဖော်ပြသည်။
အဆိုပါ တိုက်ခိုက်မှုများအတွင်း လူထိခိုက်မှုမရှိခဲ့ဟုလည်း TNLAက ထုတ်ပြန်သည်။ ညပိုင်း တိုက်ခိုက်မှု အပါအဝင် ယမန်နေ့တိုက်ပွဲ၌ စစ်ကောင်စီတပ်က လေကြောင်းတိုက်ခိုက်မှု ၁၅ကြိမ်ခန့် ရှိခဲ့ပြီး ရဟတ်ယာဉ်များ အသုံးပြုပြီး စစ်အင်အားနှင့် လက်နက်ခဲယမ်းဖြည့်တင်းမှုများလည်းရှိသည်ဟု ဆိုသည်။
စစ်ကောင်စီတပ်၏ ထိုးစစ်ကြောင့် တိုက်ပွဲဖြစ် ပွားရာနေရာအနီးရှိ ကုန်းသာ၊ ဟူမန်း၊ မန်လုံး၊ တာလတ်ကျေးရွာမှ ဒေသခံပြည်သူ ၁,၅၀၀ခန့် စစ်ဘေးရှောင်နေကြရသည်ဟု TNLAက အသိပေးထားသည်။