ရွှေကျင်သာသနာပိုင် စံကင်းဆရာတော်၊ ဝါဆိုဆရာတော်တို့၏ မွေးရပ်မြေ စစ်ကိုင်းမြို့နယ်၊ မိုးသောက်(ဘောက်သောက်) ကျေးရွာအုပ်စု၊ လင်းယဉ် ၅ ရွာမှ နေအိမ် ၇၀၀ကျော်အား စစ်ကောင်စီတပ်က မီးရှို့ဖျက်ဆီးသွားကြောင်း ဒေသတွင်းသတင်းရင်းမြစ်များက ပြောသည်။
ဒီဇင်ဘာ၂၁ ရက်က စစ်ကိုင်းမြို့နယ်၊ မိုးသောက် (ဘောက်သောက်) ကျေးရွာအုပ်စု၊ လင်းယဉ် ၅ ရွာသို့ စစ်ကောင်စီတပ် ဝင်ရောက်ကာ မိုးသောက်ရွာမှ နေအိမ်၂၅၀လုံး ၊ လင်းယဥ်ရွာမှ နေအိမ် ၁၅၀ ၊ လင်းယဉ်ရွာသစ်မှ နေအိမ် ၁၃၀ ၊ ရှမ်းကုန်းရွာမှ နေအိမ် ၁၄၈ လုံး၊ ကုန်းကြီးရွာမှ နေအိမ် ၅၁လုံး စုစုပေါင်း လူနေအိမ် ၇၂၉လုံး ကို တပ်မ(၃၃) စစ်ကောင်စီ စစ်ကြောင်းက မီးရှို့ဖျက် ဆီးခဲ့ကြောင်း စစ်ကိုင်းမြို့နယ် သတင်းမှန်ပြန်ကြားရေးအဖွဲ့က ပြောသည်။
ထို့အပြင် ဒေသခံ အမျိုးသားအချို့လည်း ဖမ်းဆီးခံရကာ တစ်ဦးပစ်ခတ်သတ်ဖြတ်ခံခဲ့ရကြောင်း ဒေသခံများက ပြောသည်။
“သက်တော် ရာကျော်ရှည်ခဲ့တဲ့ နဝမရွှေကျင်သာသနာပိုင် စံကင်းဆရာတော်၊ မန္တလေးမြို့ အနောက်ပြင် မဟာဝိသုဒ္ဓါရုံတိုက်သစ် ဝါဆိုကျောင်းက ရွှေကျင်ဂိုဏ်း သာသနာပိုင် ဆရာတော် ဥုးအဂ္ဃိယ တို့ရဲ့ မွေးရပ်မြေကို တပ်မ (၃၃)က ရွာလုံးကျွတ်မီးရှို့ခဲ့တာဖြစ်ပါတယ်။”ဟု စစ်ကိုင်းမြို့နယ် သတင်းမှန်ပြန်ကြားရေးအဖွဲ့က ပြောသည်။
Public Service Announcement
အိမ်ခြေ အကုန်နီးပါး မီးလောင်ကျွမ်းခဲ့၍ အရေးပေါ် ရိက္ခာ၊ မိုးကာ၊ အဝတ်အထည်၊ စောင်နှင့် အခြား အသုံးအဆောင်ပစ္စည်းများ လိုအပ်လျက် ရှိကြောင်း ဒေသခံများက ပြောသည်။
စစ်ကိုင်းမြို့နယ်တွင် တစ်နှစ်အတွင်း ကျေးရွာရွာ ၂၅ရွာရှိ အိမ်ခြေ ၁,၆၅၂လုံးကို အာဏာသိမ်းစစ်ကောင်စီတပ်၊ရဲနှင့် ၎င်းတို့၏ လက်အောက်ခံ ပျူများက မီးရှို့ဖျက်ဆီးခဲ့ကြသည်။
