လက်ကျန်အမှု ၅ မှု နဲ့ ဒေါ်အောင်ဆန်းစုကြည်ကို စစ်ကောင်စီ ထောင်ဒဏ် ၇ နှစ်ထပ်ချ

ဒေါ်အောင်ဆန်းစုကြည်အပေါ် အမှု ၁၉ မှုနဲ့ စစ်ကောင်စီ ထောင်ဒဏ် စုစုပေါင်း ၃၃ နှစ်ချထား

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စွဲဆိုထားတဲ့အမှုတွေထဲက နောက်ဆုံးလက်ကျန် ၅ မှုအတွက် ဒီနေ့မှာ စစ်ကောင်စီက ထောင်ဒဏ် ၇ နှစ် ချလိုက်တယ်လို့ သိရပါတယ်။

အမှု ၅ မှုမှာ ၄ မှုကို ၁ မှု ထောင်ဒဏ် ၃ နှစ်စီချပေမယ့် စစ်ကောင်စီတရားရုံးက အဲဒီ ၄ မှုကိုတပေါင်းတည်း အဖြစ် ၃နှစ်သာကျ ခံဖို့ ဆုံးဖြတ်တယ်လို့ လို့သိရပါတယ်။

ကျန်တဲ့ ၁ မှုကိုတော့ ထောင်ဒဏ် ၄ နှစ် ချပြီး သီးခြားကျခံဖို့ အမိန့်ချတာကြောင့် လက်ကျန်အမှု ၅ မှုအတွက် စုစုပေါင်းထောင်ဒဏ် ၇ နှစ် ဒီနေ့ချတာလို့ နေပြည်တော်အချုပ်ထောင်တွင်း တရားရုံးနဲ့ နီးစပ်သူအချို့ထံက သိရပါတယ်။

ဒီနေ့အမိန့်ချတဲ့ အမှု ၅ မှုဟာ NLD အစိုးရလက်ထက်မှာ သဘာဝဘေးအတွက် ပုဂ္ဂလိက ရဟတ်ယာဉ် ဌားရမ်းတာ ၊အီတလီထုတ်ရဟတ်ယာဉ် ဝယ်ယူရာမှာ နိုင်ငံဘဏ္ဍာနစ်နာတယ်ဆိုပြီး စစ်ကောင်စီက တရားစွဲတာလည်းဖြစ်ပါတယ်။

Public Service Announcement

စစ်တပ်အာဏာသိမ်းပြီးနောက် ဒေါ်အောင်ဆန်းစုကြည်ကို စစ်ကောင်စီက အမှုပေါင်း ၁၉ မှုနဲ့ တရားစွဲခဲ့ပါတယ်။

အဲဒီအမှုတွေအတွက် ဒီနေ့ချလိုက်တဲ့ ထောင်ဒဏ်ပါ ပါရင် ဒေါ်အောင်ဆန်းစုကြည်အပေါ် စစ်ကောင်စီ ချထားတဲ့ ထောင်ဒဏ် ဟာ ၃၃ နှစ်ထိ ရှိပါတယ်။

လက်ရှိမှာတော့ စစ်ကောင်စီက ဒေါ်အောင်ဆန်းစုကြည်အပေါ် စွဲဆိုထားတဲ့ အမှုတွေအားလုံး ပြီးပြတ်သွားပြီလည်းဖြစ်ပါတယ်။