စစ်ကောင်စီကျင်းပမယ့် ရွေးကောက်ပွဲအတွက် မဲစာရင်းပြုစုဖို့ပြင်ဆင်နေတဲ့ မကွေးတိုင်း၊ ရေစကြိုမြို့နယ်ရဲ့ လဝက ရုံးကို ဒီနေ့မနက်အစောပိုင်းမှာ ပြည်သူ့ကာကွယ်ရေးတပ်ဖွဲ့(ပ.က.ဖ) က ဝင်ရောက်မီးရှို့လိုက်ပါတယ်။
ရေစကြို လဝက ရုံးဟာ မနက် ၁ နာရီလောက်မှာ မီးလောင်ခဲ့တာဖြစ်ပြီး လဝက ရုံးကို ပြာချပေးခဲ့တယ်လို့ ရေစကြို ပ.က.ဖ က သတင်းထုတ်ပြန်ပါတယ်။
ရုပ်သံဖိုင်ထဲမှာ လဝက ရုံးက အချက်အလက်စာရွက်စာတမ်းတွေကို မီးရှို့တာတွေ့ရပါတယ်။
ဒီလို ဖျက်ဆီးတာဟာ ပြည်သူတွေ မှတ်ပုံတင်လုပ်တဲ့အခါ ငွေကြေးတောင်းခံတာ ၊ စစ်ကောင်စီရွေးကောက်ပွဲအတွက် မဲစာရင်းပြုစုတာတွေကြောင့်ဖြစ်တယ်လို့ ရေစကြို ပ.က.ဖ ပြောထားပါတယ်။
Public Service Announcement
ဒီနှစ်ထဲ ကျင်းပမယ့်ရွေးကောက်ပွဲအတွက် လူဦးရေစာရင်းကို စစ်ကောင်စီက ဇန်နဝါရီလ ၁၀ ရက်ကစတင်ပြီ ဒီလကုန်ပိုင်းအထိကောက်ယူနေတာပါ။
NUG နဲ့ တော်လှန်ရေးအင်အားစုဘက်က စစ်ကောင်စီရဲ့ရွေးကောက်ပွဲ ကို ဆန့်ကျင်ကြပြီး လူဦးရေစာရင်းကောက်ယူတဲ့အခါ မပူးပေါင်းဖို့လူထုကိုတိုက်တွန်းထားပါတယ်။
ဒါအပြင် NUG ပြည်ထဲရေးဝန်ကြီးဌာနကဆို လူဦးရေစာရင်းကောက်ယူသူတွေကို အကြမ်းဖက်ဥပဒေနဲ့ပြင်းပြင်းထန်ထန်အရေးယူမယ်လို့သတိပေးချက်ထုတ်ပြန်ထားပါသေးတယ်။
လတ်တလော စစ်ကောင်စီလူဦးရေစာရင်းကောက်ယူတဲ့နေရာအချို့ မှာ ပေါက်ကွဲမှုဖြစ်တာ ၊ စာရင်းကောက်အဖွဲ့ လုံခြုံရေးယူပေးတဲ့ ဒုရဲအုပ်တစ်ဦး ပစ်သတ်ခံရတာတွေရှိခဲ့ပါတယ်။
အခု လဝက ရုံး တစ်ရုံး ပထမဆုံးအကြိမ် မီးရှို့ခံရတာလည်းဖြစ်ပါတယ်။
ရေစကြို မြို့နယ်ဟာ မကွေးတိုင်းရဲ့အရှေ့ဘက်အကျဆုံးမြို့ဖြစ်ပြီး စစ်ကောင်စီကိုအပြင်းအထန်တော်လှန်နေတဲ့ စစ်ကိုင်းတိုင်းနဲ့ထိစပ်နေပါတယ်။
