အကြမ်းဖက်စစ်ကောင်စီ၏ တရားမဝင်ရွေးကောက်ပွဲအတွက် လူစာရင်းပြုလုပ်နေသည့် မန္တလေးမြို့ မဟာအောင်မြေမြို့နယ် စင်္ကြာနွယ်စဉ် ရပ်ကွက်ရုံးကို လက်ပစ်ဗုံးဖြင့် တိုက်ခိုက်ခဲ့ကြောင်း No More Dictatorship People Defence Force – NMD မှ တာဝန်ရှိသူကပြောသည်။
အုပ်ချုပ်ရေးမှူးများ ၊ပျူစောထီးများ နှင့် စစ်ကောင်စီတပ်ဖွဲ့ဝင်များက ယင်းရပ်ကွက်ရုံးအတွင်း ရွေးကောက်ပွဲအတွက် ပြုလုပ်နေခြင်းဖြစ်ပြီး ဇန်နဝါရီ ၁၇ ရက် ညနေ ၅နာရီခန့်တွင် တိုက်ခိုက်ခဲ့ခြင်းဖြစ်သည်ဟု ဆိုသည်။
“ဗုံးပေါက်ပြီးနောက် အုပ်ကြီး၊ ပျူ၊ စခများမှ ကြောက်လန့်ပြီး ပြည်သူများအား အော်ဟစ်ဆဲဆို ကြိမ်းမောင်းနေကြောင်း သိရပါသည်။ နောက်ဆက်တွဲ သတင်းအရ ထိုရပ်ကွက်အား ယနေ့ည ဧည့်စာရင်း စစ်မည်ဟု သတင်းရရှိပါသည်။ အထိအခိုက်စာရင်းကို အတည်မပြုနိုင်သေးပါ။ ” NMD ကသတင်းထုတ်ပြန်ထားသည်။
NMDအဖွဲ့သည် အယောင်ဆောင်ရွေးကောက်ပွဲအတွက် လုပ်ဆောင်နေသူများကို သတိပေးခဲ့ပြီးနောက် တိုက်ခိုက်မှုများဆက်တိုက်လုပ်ဆောင်နေခြင်းဖြစ်သည်။
Public Service Announcement
ဇန်နဝါရီ ၁၆ ရက်ကလည်း ရွေးကောက်ပွဲအတွက် စစ်ကောင်စီနှင့်ပူးပေါင်းလုပ်ဆောင်နေသည့် နေရာနှစ်ခုကို တိုက်ခိုက်မှုများပြုလုပ်ခဲ့သည်။
“သီရိမာလာက ဗုံးက errorဖြစ်သွားတယ်ဗျ၊အမရပူရကတော့ အစကအထဲပစ်မလို့ ကလေးထွက်လာတာမြင်တော့ လက်ကတွန့်သွားပြီး အပေါက်နားက ပစ်ပြီးပြေးခဲ့ရတာ။”ဟု ဇန်နဝါရီ ၁၆ရက်ကပြုလုပ်ခဲ့သည့် စစ်ဆင်ရေး နှစ်ခုအကြောင်းနှင့်ပတ်သက်ပြီး ပြောသည်။
ထို့ကြောင့် ပြည်သူများအနေဖြင့် တရားမဝင်ရွေးကောက်ပွဲနှင့် သက်ဆိုင်သည့် နေရာများကို သွားလာခြင်းမပြုရန် ၎င်းက မေတ္တာရပ်ခံသည်။
NMD အနေဖြင့် စစ်ကောင်စီ၏ တရားမဝင်ရွေးကောက်ပွဲတွင်ပူးပေါင်းပါဝင်ခြင်းမပြုရန် ဇန်နဝါရီ ၁၁ ရက်က မန္တလေးမြို့ရှိ လူဦးရေစာရင်းကောက်ယူသည့်နေရာ ငါးနေရာတွင် ဖောက်ခွဲမှုများပြုလုပ်၍ သတိပေးခဲ့သည်။
