စစ်ကိုင်းတိုင်း၊ အရာတော်မြို့နယ်၊ နောင်ကြီးအိုင် ကျေးရွာ၌ အထိုင်ချနေသော စစ်ကောင်စီလက်ပါးစေ ရဲအုပ်စုအား သွားရောက်ပစ်ခတ်တိုက်ခိုက်ရာ ထိခိုက်သေဆုံးမှုရှိကြောင်း မိုးသီးမုန်တိုင်း Defense Force အဖွဲ့က သတင်းထုတ်ပြန် သည်။
ဇန်နဝါရီ ၁၆ရက် နံနက် ၁၁နာရီခန့်က အရာတော် မြို့နယ်၊ နောင်ကြီးအိုင်ကျးရွာတွင် အထိုင်ချနေသော ရဲစခန်းအား လက်နက်ငယ်များဖြင့် ပစ်ခတ် တိုက်ခိုက်ခဲ့ခြင်းဖြစ်သည်။
ရဲများကလည်း ၁နာရီခန့်ကြာ ရမ်းသမ်းပစ်ခတ်ခဲ့ကြောင်း၊ ထို့နောက် ရဲ ၁၂ ဦးမှာ အောင်သုခရွာအတွင်းသို့ ဝင်ရောက်ပြီး နေအိမ်တစ်လုံးနှင့် တဲတစ် လုံးကို မီးရှို့ဖျက်စီးသွားကြောင်း မိုးသီးမုန်တိုင်း Defense Force အဖွဲ့က ဆိုသည်။
အောင်သုခရွာအတွင်းသို့ ဝင်ရောက် မွှေနှောက် ပြီးအပြန်တွင် အဆိုပါ ရဲ ၁၂ဦးအား မိုင်းခွဲတိုက်ခိုက်ခဲ့ကြောင်း အထိအခိုက်မရှိဘဲ ပြန်လည်ဆုတ် ခွာခဲ့ကြောင်း ၊ဖြစ်စဥ်တွင် ရဲများထိခိုက်မှုရှိသော်လည်း စုံစမ်းနေကြောင်း မိုးသီးမုန်တိုင်း Defense Force အဖွဲ့က ဆိုသည်။
Public Service Announcement
ဖြစ်စဥ်နှင့်ပတ်သက်၍ ဒေသတွင်းတော်လှန်းအင်အားစုများထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
အဆိုပါ စစ်ဆင်ရေးကို မိုးသီးမုန်တိုင်း Defense Force၊ အရာတော်မြို့နယ် ကျားသစ်နက်ပြောက်ကျားတပ်ဖွဲ့၊ မုံရွာခရိုင်တပ်ရင်း (၆)၊ အရာတော်မြို့နယ် (ပ.က.ဖ)ရဲဘော်များ၊ ဗိုလ်ဥသြအဖွဲ့နှင့်မြောက်ပိုင်းညီနောင်များ မဟာမိတ်တပ်ပေါင်းစု (N.B.A.R.S )တို့ ပါဝင်တိုက်ခိုက်ခဲကြောင်း အသိပေးထားသည်။
အဆိုပါ နောင်ကြီးအိုင်ရွာ ရဲစခန်းရှိ ရဲများသည် ပြီးခဲ့သည့် ဒီဇင်ဘာ ၂၃ ရက်ကလည်း အောင်သုခရွာရှိ နေအိမ်တစ်လုံးနှင့် ဆီစက်တဲတစ်လုံး မီးရှို့ဖျက်ဆီးခဲ့ကြောင်း သိရသည်။
