ထီးချိုင့်မြို့၊ တကောင်းနီကယ်စက်ရုံဂိတ်ကို မိုင်းဆွဲတိုက်ခိုက်ခဲ့ရာ ဂိတ်စောင့်ရဲနှစ်ဦး ပွဲချင်းပြီးသေဆုံးသွားကြောင်း ထီးချိုင့်မြို့ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးကပြောသည်။
တကောင်းနီကယ်စက်ရုံဂိတ်ကိုယမန်နေ့(ဖေဖော်ဝါရီ၃ ရက်)ညနေ ၃ နာရီခန့်တွင်ပြည်သူ့ကာကွယ်ရေးရဲဘော်များကမိုင်းဆွဲတိုက်ခိုက်ခဲ့ခြင်းဖြစ်သည်။
“ နီကယ်ဂိတ်ကို မနေ့ကညနေက မိုင်းဆွဲခဲ့တာ။ရဲနှစ်ကောင် တစ်စစီဖြစ်သွားတယ်” ဟု ထီးချိုင့်မြို့ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးကပြောသည်။စစ်ကောင်စီရဲများထိခိုက်မှုအခြေအနေကို People’s Spring ကသီးခြားအတည်မပြုနိုင်ပါ။
ယခုရက်ပိုင်းထီးချိုင့်ဒေသတိုက်ခိုက်မှုများတွင်စစ်ကောင်စီတပ်အထိနာနေသည်ဟု ဒေသခံများကပြောသည်။
ဖေဖော်ဝါရီလ ၂ရက် နံနက်အစောပိုင်းကလည်းထီးချိုင့်မြို့၊မြတောင်လမ်းဆုံမှ စစ်ကောင်စီစစ်ဆေးရေးဂိတ်ကို KIA နှင့် PDF ပူးပေါင်းအဖွဲ့က တိုက်ခိုက်ခဲ့သည်။အဆိုပါတိုက်ပွဲတွင် စစ်ကောင်စီတပ်ဖွဲ့ဝင်သုံးဦးသေဆုံးပြီးတစ်ဦးကိုအရှင်ဖမ်းမိခဲ့သည်။ သေနတ်(၄)လက်ကို KIA နှင့် PDF ပူးပေါင်းအဖွဲ့က သိမ်းဆည်းနိုင်ခဲ့သည်။
ထိုအပြင်မြတောင်လမ်းဆုံနေရာသို့ စစ်ကူလာသည့် စစ်ကောင်စီစစ်ကြောင်းကိုလည်း ပြည်သူ့ကာကွယ်ရေးအဖွဲ့ (တကောင်း) က ကြားဖြတ်တိုက်ခိုက်ခဲ့သည်။သပိတ်ကျင်းမြို့နယ် (၇) မိုင်တပ်မှ စစ်ကောင်စီတပ်ကခြောက်ဘီးကား နှစ်စီးအပြည့်ဖြင့်လိုက်လာစဉ် ပြည်သူ့ကာကွယ်ရေးမဟာ
မိတ်တပ်ဖွဲ့များက ကြားဖြတ်တိုက်ခိုက်ခဲ့ခြင်းဖြစ်ကြောင်း ပြည်သူ့ကာကွယ်ရေးအဖွဲ့ (တကောင်း)က ထုတ်ပြန်ထားသည်။
တကောင်းနီကယ်သတ္ထုထုတ်လုပ်မှုစီမံကိန်းကို၂၀၀၈ ခုနှစ် ဇူလိုင်မှ စတင်ကာ အမှတ် ၁ သတ္တုတွင်းလုပ်ငန်းနှင့် တရုတ်ကုမ္ပဏီ Myanmar CNMC Nickel တို့က အကျိုးတူပူးပေါင်းလုပ်ကိုင်နေခြင်းဖြစ်သည်။ ထိုစီမံကိန်းစာချုပ်ကာလမှာ နှစ် ၂၀ဖြစ်သည်။
