လုံခြုံမှုရှိပြီး တည်ငြိမ်အေးချမ်းသည့် ကရင်အမျိုးသားတို့၏ အနာဂတ် ဘ၀သာယာလှပရေးအတွက် ကရင်အမျိုး သားအချင်းချင်းကြား၊ ကရင်အမျိုးသားအဖွဲ့အစည်းအချင်းချင်းကြား မှန်ကန်သည့် မျိုးချစ်စိတ်ဓာတ်ကို အခြေခံ၍ မိမိတို့၏ အမျိုးသားရေးမျှော်မှန်းချက်နှင့် နိုင်ငံရေးရည်မှန်းချက် ပန်းတိုင်ရောက်ရှိရေးအတွက် စည်းလုံးညီညွတ်စွာ ချီတက်တိုက်ပွဲဝင်သွားကြရန် ကရင်အမျိုးသားအစည်းအရုံး(KNU) ဥက္ကဋ္ဌ ဗိုလ်ချုပ်ကြီး စောမူတူးစေးဖိုး က တိုက်တွန်းလိုက်သည်။
မနက်ဖြန် ဖေဖော်ဝါရီ ၁၁ရက်၌ ကျရောက်မည့် (၇၅)နှစ်မြောက် ကရင်အမျိုးသားနေ့သို့ KNU ဥက္ကဋ္ဌ ပြောကြားသည့် မိန့်ခွန်းကို ယနေ့ ထုတ်ပြန်ခဲ့ခြင်းဖြစ်သည်။
ရုပ်ပိုင်းဆိုင်ရာ လုံခြုံမှုသည် အခြားသော လုံခြုံမှုများနှင့် ဖွံ့ဖြိုးတိုးတက်မှု အားလုံး၏ အခြေခံ အကြောင်းတရား ဖြစ်ကြောင်း KNU ဥက္ကဋ္ဌက ဆိုသည်။
သက်ဆိုင်ရာ ကရင်အမျိုးသားများ၏ အဖွဲ့အစည်းများ၊ ကရင်အမျိုးသားများ၏ အရေးနှင့် လူထုရေးရာ ခေါင်းဆောင်မှု စီမံခန့်ခွဲမှု အသိပညာအတက်ပညာနှင့် နည်းပညာရပ်ဆိုင်ရာ ဖွံ့ဖြိုးတိုးတက်မှုများသည် ကရင်အမျိုး သားများ၏ ဖွံ့ဖြိုးတိုးတက်ရခြင်း၏ အခြေခံ အကြောင်းအရင်း နောက်တစ်ရပ်ဖြစ်ကြောင်း ၎င်းက ပြောသည်။
Public Service Announcement
ကရင်အမျိုးသားများ၏ စီးပွားရေးဆိုင်ရာ ဖွံ့ဖြိုးတိုးတက်ရခြင်း၏ အခြေခံအကြောင်းတရားသည် ရုပ်ပိုင်းဆိုင်ရာ လုံခြုံမှုကြောင့်သာလျင်ဖြစ်ပြီး စီးပွားရေးဆိုင်ရာ ဖွံ့ဖြိုးတိုးတက်မှုကြောင့် ကရင်အမျိုးသားများ၏ အမျိုးသားရေးလှုပ်ရှားမှု အရှိန်အဟုန် အလျင်အမြန် ကြီးထွားလာခဲ့ခြင်းဖြစ်သည်ဟု KNU ဥက္ကဋ္ဌက ဆိုသည်။
အဆိုပါ အကြောင်းတရားများကြောင့် ကရင်အမျိုးသားများ၏ စိတ်ဓာတ်ရေးရာ အရ မြင့်မားလာစေခြင်း၊ ရှင်သန်နိုးကြားလာစေခြင်း၊ စည်းလုံးညီညွတ်မှု၏ အင်အားနှင့် ဖွံ့ဖြိုးတိုးတက်မှုများကို တွန်းအားပေးခဲ့သည့် အဓိက အခြေခံအကြောင်းတရားများ ဖြစ်ကြောင်း၊ ကရင်အမျိုးသားများ၏ သိက္ခာ အရှိန်အဝါ ဂုဏ်သတင်း နှင့် ကြီးကျယ်ခန်းနားမှုများကိုလည်း ကမ္ဘာအထိ ထင်ပေါ်ကျော်ကြားစေခဲ့ကြောင်း ဗိုလ်ချုပ်ကြီးစောမူတူးစေးဖိုးက ပြောသည်။
ရုပ်ပိုင်းဆိုင်ရာ လုံခြုံမှု၊ အသိပညာ၊ အတက်ပညာနှင့် စီးပွားရေးဆိုင်ရာ လုံခြုံမှုများ ကင်းမဲနေခြင်းသည် လူမျိုး တစ်မျိုးအဖြစ် ဂုဏ်သိက္ခာ ရှိရှိ ဖွံ့ဖြိုးတိုးတက်လာရန် လုံး၀မဖြစ်နိုင်ကြောင်း ပြန်လည်အောက်မေ့ သတိရှိနေရန် လိုအပ်သည်ဟုလည်း KNU ဥက္ကဋ္ဌက ပြောကြားသည်။
