အရပ်သားအချို့ ဒဏ်ရာရ၊ အိမ်မွေးတိရိစ္ဆာန်များသေဆုံးမှုရှိ
ကရင်အမျိုးသားအစည်းအရုံး(KNU) ညောင်လေးပင်ခရိုင် တပ်မဟာ(၃)နယ်မြေ ရှိကျေးရွာများအားစစ်ကောင်စီက လက်နက်ကြီးဖြင့် ပစ်ခတ်တိုက်ခိုက်၍ ဒေသခံထောင်နှင့်ချီ ထွက်ပြေးတိမ်းရှောင်နေကြရကြောင်း KNU ဗဟိုက သတင်းထုတ်ပြန်သည်။
ဖေဖော်ဝါရီ ၁၁ရက် ညပိုင်းနှင့် ဖေဖော်ဝါရီ ၁၂ရက် နံနက်ပိုင်းတွင်ရညောင်လေးပင်ခရိုင် ပုဇွန်မြောင်းကျေးရွာတွင် ဝင်ရောက်တပ်စွဲထားသော အာဏာသိမ်းအကြမ်းဖက် စစ်ကောင်စီ၏ ခမရ (၂၀)သည် ဆောထိ(ရွှေကျင်)မြို့နယ်အတွင်းသို့ ရည်ရွယ်ချက်ရှိရှိ လက်နက်ကြီးများ ပစ်ခတ်ခဲ့ကြောင်း၊ ထိုသို့ ပစ်ခတ်၍ ရွှေကျင်မြို့နယ် ညောင်ပင်ကြီးရွာသစ်နှင့် ညောင်ပင်ကြီးရွာမကျေးရွာတွင်းသို့ ကျရောက်ပေါက်ကွဲပြီး ပြည်သူလူထုများ မွေးမြူထားသော နွား လေးကောင်ကို ထိခိုက်သေဆုံးခဲ့ကြောင်း ဖော်ပြသည်။
ဖေဖာ်ဝါရီ ၁၁ရက်တွင် စစ်ကောင်စီတပ်၏ ခမရ(၂၀)မှ လက်နက်ကြီး သုံးလုံးပစ်ခတ်ခဲ့၍ ဒေသခံသုံးဦး ထိခိုက်ဒဏ်ရာရရှိထားသည်။
ထိုသို့ တိုက်ခိုက်ခံရချိန်မှစ၍ ညောင်ပင်ကြီးရွာ၊ ညောင်ပင်ကြီးရွာသစ်နှင့် သက်တူးကုန်းကျေးရွာမှ ပြည်သူလူထုသည် ကျေးရွာအတွင်း မနေရဲကြတော့ဘဲ အနီးအနားရှိကျေးရွာများ၊ နီးစပ်ရာဆွေမျိုးများနှင့် မြို့ပေါ် များသို့ ရွာလုံးကျွတ် ထွက်ပြေးတိမ်းရှောင်ရကြောင်း KNUက ထုတ်ပြန်သည်။
Public Service Announcement
ထွက်ပြေးတိမ်းရှောင်ရသည့် ကျေးရွာ သုံးရွာတွင် အိမ်ခြေစုစုပေါင်း ၂၆၉လုံးနှင့် လူဦးရေ ၁,၂၀၀ ကျော်ရှိကြောင်း ဖော်ပြထားသည်။
စစ်ကောင်စီတပ်ကကျေးရွာများအတွင်းသို့ လက်နက်ကြီးများပစ်ခတ်၍ ကလေးငယ်များ အပါအဝင် အရပ်သားသေဆုံးထိခိုက်မှုများ မကြာခဏ ရှိခဲ့သည်။
