ရောင်နီလာရာလမ်းရုပ်ရှင် ရန်ပုံငွေ သိန်းနှစ်ထောင်ကျော်ရပြီဟုဆို

ရောင်နီလာရာလမ်း ရုပ်ရှင်ကို ဖေဖော်ဝါရီလအတွင်း နိုင်ငံခြောက်နိုင်ငံ၌ ပြသခဲ့ရာ ရန်ပုံငွေ သိန်း နှစ်ထောင်ကျော်ရရှိခဲ့ကြောင်း ယင်းဇာတ်ကားဖန်တီးသူ ကိုပေါက်က ပြောသည်။

‌ယင်းရုပ်ရှင်ကို ဖေဖော်ဝါရီ ၄ ရက်တွင် ဂျပန်နိုင်ငံ၌ စတင်ရုံတင်ပြသခဲ့ခြင်းဖြစ်ပြီး ပထမဆုံးပွဲတွင် ရန်ပုံငွေ သိန်း ကိုးရာကျော်ရရှိခဲ့သည်။

ထို့ပြင် ဖေဖော်ဝါရီ လအတွင်း၌ ဂျပန်၊ အမေရိကန်၊ နယ်သာလန်၊ ကနေဒါ၊ ဆွီဒင်နှင့် ဂျမေကာ နိုင်ငံတို့၌ ရုံတင်ပြသခဲ့ပြီး ရန်ပုံငွေ သိန်းနှစ်ထောင်ကျော်ရရှိခဲ့ခြင်းဖြစ်သည်။

ယင်းရုပ်ရှင်သည် ဒါရိုက်တာကိုပေါက်၏ တော်လှန်ရေးသမားဘဝ ပုံရိပ်များကို မှတ်တမ်းပုံစံရိုက်ကူးထားခြင်းဖြစ်သည်။

Public Service Announcement

မတ်လအတွင်း နယူးယောက်၊ လန်ဒန်၊ ဆစ်ဒနီ စသည့် မြို့များတွင် ဆက်လက်ပြသမည်ဖြစ်ပြီး မတ်နှင့် ဧပြီလအတွင်း အာရှ၊ ဥရောပ၊ အမေရိကန်၊ ဩစတေးလျ စသည့် နေရာများရှိ မြို့ပေါင်း ၂၀ ကျော်တွင်ပြသမည်ဟု ကိုပေါက်ကအသိပေးထားသည်။

ယင်းရုပ်ရှင်ကို အားပေးသည့် ပရိသတ်များအတွက် ဒါရိုက်တာကိုပေါက် ကိုယ်တိုင်ရေးဆွဲထားသည့် ပန်းချီကားများကို လက်ဆောင်ပေးရန် အစီအစဉ်ရှိပြီး လက်ဆောင်ပေးမည့်ပွဲစဉ်များကို ၎င်းတို့၏ ပေ့ခ်ျများမှ ကြေညာပေးမည်ဖြစ်သည်။

ပြီးခဲ့သည့် နှစ်အတွင်းက ဒါရိုက်တာကိုပေါက်၏ မသောက်မိသော မိုးခါးရေ ရုပ်ရှင်ကို နိုင်ငံပေါင်း ၂၀ ကျော်ရှိ ရုပ်ရှင်ရုံ ၆၀ ကျော်၌ ပြသခဲ့ရာ ရန်ပုံငွေ သိန်းတစ်သောင်းကျော်ရရှိခဲ့သည်။