ကော်သူးလေအုပ်ချုပ်နယ်မြေ ခလယ်လွီထူ(ညောင်လေးပင်) ခရိုင်အတွင်း လက်နက်ကြီးရန်ကြောင့် ကျေးရွာ ၆ ရွာ ရွာလုံးကျွတ်ထွက်ပြေးတိမ်းရှောင်နေကြရကြောင်း သတင်းရရှိသည်။
လယ်ဒိုမြို့နယ်အတွင်းရှိ ကျေးရွာများအတွင်းသို့ စစ်ကောင်စီတပ်က လက်နက်ကြီးများ ဆက်တိုက်ပစ်ခတ်ခဲ့သောကြောင့် နေအိမ်(၅)လုံးထက်မနည်း မီးလောင်ပြာကျ ထိခိုက်ပျက်စီးခဲ့ရပြီး ကျေးရွာပေါင်း(၆)ရွာမှ ဒေသခံပြည်သူ(၃၀၀၀)ကျော် ရွာလုံးကျွတ် ထွက်ပြေးတိမ်းရှောင်နေကြရသည်ဟု ကေအဲန်ယူ-ကရင်အမျိုးသားအစည်းအရုံး ဗဟိုက ထုတ်ပြန်သည်။
ပြီးခဲ့သည့် ဖေဖေါ်ဝါရီလ(၂၇)ရက် က စစ်တောင်းမြစ်အနောက်ဘက်ကမ်းမှနေ၍ စစ်တပ်ကလက်နက်ကြီး(၆)ချက်ခန့် ပစ်ခတ်ခဲ့ရာ ကျေးရွာအတွင်း နေအိမ် ၂ လုံးမီးလောင်ဆုံးရှုံးခဲ့သည်။
ထို့အပြင် ဖေဖေါ်ဝါရီလ(၂၈)နေ့တွင်လည်း စစ်တပ်က ကျေးရွာနှစ်ရွာအတွင်း လက်နက်ကြီး(၄)ချက်ပစ်ခတ်ခဲ့ရာ နေအိမ်တစ်လုံးမီးလောင်ပြာကျခဲ့ပြန်သည်။ အလားတူ မတ်လ(၁)ရက်၊ (၂)ရက်နှင့် (၄)ရက်တို့တွင်လည်း နောက်ကျေးရွာနှစ်ရွာကို လက်နက်ကြီးနှင့်ပစ်ခတ်ခဲ့ပြီး နေအိမ် ၂ လုံးမီးလောင်ဆုံးရှုံးခဲ့ရသည်ဟုဆိုသည်။
Public Service Announcement
ယင်းကဲ့သို့ လက်နက်ကြီးနှင့် ပစ်ခတ်မှုများကြောင့် စစ်တောင်းမြစ်အရှေ့ဘက်ခြမ်းရှိ ကေအဲန်ယူ-လယ်ဒိုမြို့နယ်အတွင်းရှိ ကျေးရွာများဖြစ်သော ကျီးပင်စု၊ လိန်ပင်ဝဲ၊ သစ်ဖရောင်းတန်း၊ ဝဲမှူး၊ ကျည်စုနှင့် အလယ်ကျွန်းကျေးရွာ စသည့် ကျေးရွာ(၆)ရွာမှ ဒေသခံပြည်သူလူထု(၃၁၇၄)ဦး နေရပ်စွန့်ခွာပြီး ဘေးလွတ်နေရာသို့ ရွာလုံးကျွတ် ထွက်ပြေးတိမ်းရှောင်နေကြရသည်။
ထွက်ပြေးတိမ်းရှောင်နေရသည့် ဒေသခံပြည်သူလူထုများအတွက် ကေအဲန်ယူ-လယ်ဒိုမြို့နယ် တာဝန်ရှိသူများမှ ဆေးဝါး၊ အမိုးအကာများကို စီစဉ်ဆောင်ရွက်ပေးလျက်ရှိသော်လည်း လိုအပ်ချက်များစွာရှိနေသေးကြောင်း ကေအဲန်ယူ၏ ထုတ်ပြန်ချက်အရ သိရသည်။
ကရင်ငြိမ်းချမ်းရေးကွန်ယက်(KPSN)၏ ထုတ်ပြန်ထားချက်အရ ကော်သူးလေအုပ်ချုပ်နယ်မြေ ခလယ်လွီထူခရိုင် တပ်မဟာ(၃)တွင် စစ်ကောင်စီတပ်၏ လူ့အခွင့်အရေးချိုးဖောက်မှုနှင့် စစ်ရေးဆောင်ရွက်မှုများကြောင့် ထွက်ပြေးတိမ်းရှောင်နေကြရသည့် ဒေသခံပြည်သူဦးရေ(၁၄၂၈၆၁)ဦးရှိပြီး ကေအဲန်ယူနယ်မြေအတွင်းတွင် စစ်ဘေးရှောင်ဦးရေအများဆုံးရှိသော ခရိုင်တစ်ခုဖြစ်သည်။
